Lo 2 de junh passat, Cuba comencèt de redigir una nòva Constitucion que prepausa de novetats remarcablas. D’un caire, i a un grand espandiment dels dreches individuals coma la non-discriminacion per identitat de genre, una revendicacion de la comunautat LGTBI que poiriá dobrir las pòrtas al maridatge per totes. D’autre caire, reconeis la proprietat privada, mas de biais limitat. La gestion de l’economia contunharà d’èsser menada per l’estat, mas sembla que se poirà donar de vam als entrepreneires cubans e als investidors internacionals.
 
Ça que la, la nòva Constitucion càmbia pas lo “caractèr socialista del sistèma politic e social” de Cuba del tems que ratifica que lo Partit Comunista de Cuba es la “fòrça dirigenta superiora del país”.
 
Lo tèxt tanben prevei de recuperar la figura del primièr ministre, que foguèt suprimida en 1976 e fixa un limit de dos mandats consecutius de cinc ans pel president del país.
 
Lo tèxt l'es a redigir una comission dirigida per l’ancian cap d’estat, Raúl Castro, qu’a collectat las proposicions d’un grop de trabalh creat fa qualques ans. La nòva Constitucion aurà 224 articles. L’actuala, aprovada en 1976, n’a 137.
 
Lo borrolhon serà debatut a l’Assemblada Nacionala cubana del 21 al 23 de julhet, e lo tèxt resultant serà somés a un referendum abans la fin de l’an.