A Moissac (Carcin Blanc), l’entrepresa Boyer a decidit de transformar son curum alimentari en electricitat.
En genièr, l’usina de condicionament de frucha comprèt una unitat de biometanizacion. Aital, los melons, las peras, los kiwis e mai tota la frucha gastada, poirida o non presentabla se mandan dirèctament dins doas cubas de 450_000 litres. Ailà, a la sosta de la lutz e de l’oxigèn, se desvolopa un procès natural de descomposicion. Aquela mesclanha, qu’a vist transformats sos acids grasses, es mandada per un sistèma de filtracion dins una autra cuba on se debana la metanizacion mercés a l’accion dels bactèris. Lo biogàs resultant alimenta un motor que fa d’electricitat. Boyer revend aquela electricitat a EDF (Electricitat de França), qu’amb aquò n’a pro per balhar d’electricitat a 150 familhas e de calfatge a d’autras 90.
Aver una unitat de biometanizacion es pas a posita de totas las entrepresas fruchièras. Aquela de l’entrepresa Boyer a costat 1,5 milion d’èuros, qu’una part proven de finançaments publics. L’entrepresa Boyer calcula qu’amortís lo còst en economizant 150_000 èuros per an, lo montant de son anciana curumariá.
Las entrepresas de frucha e legum produsisson mai de 120 tonas per an de curum organic.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Lo reciclatge ambé de bèstias aquò es una ideia polida : pas fòrça utila per aquelei que vivon dins la civilisacion, mai a l'avantatge dei gros de poder faire cagar lei vegans :P
Es una bèla cauva. L'a encar ben de cauvas a prospectar dins aquesto domèni.
Un autre exemple, en Valonia (sud de Belgica) leis autoritats valonas an subvencionat la compradissa de galinas per amendrir lo volume dei bordilhas dei gents (a condicien qu'aguèsson au mens un ortalon). Despuèi, lo frecham d'aquelei familhas a permès d'augmentar lo reciclatge bio.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari