Lo jornal ABC a publicat de fragments d’una correspondéncia fins ara inedita entre Franco e son ministre Ramon Serrano Suñer a prepaus de la vesita qu’el faguèt a Hitler en 1940 per negociar amb lo cap nazi l’intrada d’Espanha dins la Segonda Guèrra Mondiala. Las letras revèlan qu’una de las condicions que lo ministre franquista portèt tant a Hitler coma al ministre dels afars estrangièrs alemand, Joachim von Ribbentrop, èra la possibilitat que l’Espanha franquista aguèsse una expansion territoriala. E las demandas dins aquel sens èran de poder dispausar del contraròtle d’una vasta zòna dins lo nòrd d’Africa, compresas las illas Canàrias, e tanben de Catalonha Nòrd, qu’a aquel moment demorava jos la dominacion del regim del marescal Pétain. Alemanha veniá d’envasir França.
 
Segon çò que revèla ABC d’aquela correspondéncia, Hitler reagiguèt favorablament "al desir d’Espanha de rectificar la frontièra dels Pirenèus". Serrano Suñer explica que Hitler li diguèt: "Òm se pòt pas jamai fisar de l’amistat de França; e los cinquanta còps passats a porgir la man a aquel país, quitament en escambi de renonciar a una tèrra tant alemanda coma Alsàcia-Lorena, èran estats vans". Ditz que Hitler demorèt "enòrmament satisfach" d’aquela proposicion de far passar Catalonha Nòrd entre las mans de l’Espanha franquista. Una proposicion que jamai non se concretizèt, totun.
 
Las letras destapan que Franco èra plan dispausat a intrar dins la Segonda Guèrra Mondiala, en escambi d’aver mai de contraròtle territorial e de dispausar de pro d’armas e de combustible, en prenent en compte que fasiá plan pauc que s’èra acabada la Guèrra d’Espanha (1936-1939). "Espanha intrariá en guèrra baste que se resolguèsson sos besonhs minimals en aprovisionaments, benzina e material de guèrra", çò escriguèt Suñer.