Lo 5 d'agost que ven, coma cada an e pel 31n còp, de centenats d’occitans e catalans s’amassaràn al pòrt de Salau, al limit occitanocatalan, en Coseran, a 2100 mètres d’altitud. Los participants pojaràn del costat occitan de Salau estant (Coseran), en tot marchar doas oras e mièja, e del costat catalan d’Esterri d’Àneu estant (Palhars Sobeiran) en tot caminar aperaquí 45 minutas. L’amassada es organizada pel CAÒC e per l’ASPIC, coma una escorreguda d’amistat e de revendicacion nacionala dels dos pòbles vesins.
 
Un còp al pòrt, i faràn d’actes d’afrairament amb un escambi de produches dels dos costats: de formatge, de vin, de liquors amb de ratafiat, de galetas, de chocolat, de carnsalada, etc. Tanben se i faràn de danças tradicionalas al son dels musicians pirenencs, occitans e catalans. A mai, auràn luòc, coma d’abitud, los discorses de benvenguda, las cançons e los imnes mentre que son issadas las doas bandièras.
 
L’emplaçament d’aquel pòrt es simbolic: es un camin natural entre Occitània e Catalonha qu’a servit istoricament per far de comèrci e per connectar los dos pòbles. Pendent la Guèrra d’Espanha, de milièrs de republicans i passèron sul camin de l’exili. De costuma, los occitans i pòrtan lo formatge del temps que los catalans venon amb lo vin.
 
Tanben de costuma i participan de musicians e d’elegits dels dos costats del “calhau”, e se revendica la cultura comuna occitanocatalana e las relacions transfrontalièras que deurián ligar los païses de Palhars e Coseran.
 
 
La velha
 
En mai d’aquò, la velha, lo dissabte 4 d’agost a 18h, se tendrà a l’Ecomusèu d’Esterri d’Àneu (Catalonha) una projeccion de fotografias que festeja lo 40n anniversari del CAÒC e los filmes documentaris Vòutz de lo Sambuc e Vòutz en viatge.
 
Sus la plaça de la glèisa d'Esterri, a 21h, i aurà un balèti occitanocatalan amb lo grop catalan Semproniana e lo grop occitan Bouilleur de sons.
 
Podètz descargar lo programa d’aquela amassada occitanocatalana de referéncia.