Alexandre Benalla, un dels caps de seguretat del president de la Republica Francesa, Emmanuel Macron, es mes en examen per aver atacat un manifestant lo 1r de mai passat a París. Un vidèo,publicat dijòus passat per Le Monde, mòstra Benalla a portar un casc de policièr antisusmautas sens n’èsser un, e agarrir amb violéncia un estudiant durant la manifestacion. Los imatges an provocat un escàndol e una crisi politica. Los enregistrèron de militants del partit de Jean Luc Mélenchon, França Insomesa, e se publiquèron suls rets socials. D'en primièr o denoncièron coma un cas de violéncia policièra, car avián pas reconegut Benalla e pensavan que se tractava d'un policièr real. 

 

Lo ministèri public parisenc a dobèrt una enquèsta en acusant Benalla d'actes de violéncia de part d'una persona en mission de servici public, d’usurpacion de foncion e d’usurpacion de signes reservats a l'autoritat publica.

 

Le Monde explica que lo director del gabinet de Macron, Patrick Strzoda, a assegurat que Benalla aviá demandat de poder "observar" lo servici d'òrdre de la manifestacion e que li o autorizèt. Strzoda s'es limitat a sancionar Benalla amb una suspension d'emplec sens tractament de quinze jorns, abans que siá destituit coma responsable de la seguretat dels viatges de Macron. Aquò a aviat una avalanca de criticas. Ça que la, lo primièr ministre, Édouard Philippe, a defendut la causida de Macron en disent que Benalla a patit "la sancion pus granda contra un cap de mission", e que cal esperar que l'enquèsta esclarzisca la situacion.

 

De son costat, lo ministre de l'Interior, Gérard Collomb, a soslinhat que Benalla èra autorizat a assistir a la manifestacion del 1r de mai coma "observaire" sens "cap de legitimitat per intervenir". Dins aquel sens, Collomb a condemnat "sens ambigüitat un acte inadmissible" que "pòrta tòrt a" l'accion dels policièrs antisusmautas. Justament, Collomb a balhat una enquèsta intèrna a la polícia nacionala, puèi que Benalla portava un braçal e un casco que l'identificavan coma policièr sens que ne foguèsse un, e los autres agents li permetèron de batre l'estudiant sens reagir.

 

 

Crisi politica

 

Dins lo partit de Macron, La Republica en Marcha (LREM), los militants parlan d'un "silenci pesuc", çò ditz un deputat d’LREM a Le Monde. Segon lo quotidian francés, los deputats pròches de Macron dison pas res sus l'afar, e los que dison quicòm o fan de biais anonim. Lo sol deputat a exprimir publicament son avís es Laurent Saint-Martin, qu'a dich, net e clar, qu'après tot aquò "se pòt pas contunhar de trabalhar al costat del president de la Republica".

 

De son costat, Mélenchon a reclamat al Senat que lo president done d'explicacions per esclarzir s'el aguèt quicòm a veire amb la preséncia de Benalla a l'incident e s'èra o non al corrent abans que se rendèsse publica l'identificacion del cap de seguretat dijòus passat.

 

La marrida gestion de l'afar de part de l'Elisi, e las informacions que se destapan a cada moment a partir de l'enquèsta an dobèrt una crisi grèva dins l'executiu francés

. Le Monde ne fa un seguiment informatiu que podètz consultar aicí.