L’agéncia brasilièra Funai a enregistrat d’imatges estonables d’un òme que seriá a viure solet dempuèi 22 ans dins la selva d'Amazonia. Li dison “l’indian del trauc”. L’òme a aperaquí 50 ans e seriá en bona santat. Caça de pòrcs sauvatges, d’aucèls e de monins amb un arc e de sagetas. Se crei qu’es lo darrièr subrevivent d’una nacion de la zòna protegida de Tanaru.

 

Dins los ans 1979 e 1980, dins la region de Rondônia, de grands entrepreneires agricòlas (los fazendeiros) ataquèron qualques pòbles indigènas isolats. Fòrça foguèron tuats e d’autres fugiguèron. La darrièra ataca coneguda dels fazendeiros dins aquela region aguèt luòc en 1995 contra una nacion formada de sonque sièis personas. L’indian del trauc ne seriá estat lo sol subrevivent.

 

L’agéncia Funai ensagèt alavetz de parlar amb el, mas comprenguèt sul pic qu’el voliá pas  comunicar. Dempuèi l’an 2005, an pas cap de mena de contacte, mas li daissan d’aisinas per li facilitar la subrevivença. “Aquel òme, e mai aja perdut de fòrças e de practicas culturalas, demòstra que se pòt subreviure solet dins la selva e resistir en vivent isolat de la societat”, çò ditz Altair Algayer, coordinator regional de Funai dins l’estat de Rondônia.

 

La zòna indigèna de Tanaru, establida legalament en 2015, ten 8070 ectaras de selva protegida. L’agéncia Funai protegís l’airal dempuèi los ans 1990. Los especialistas creson que i a 113 nacions isoladas que vivon dins l’Amazonia brasilièra, dont 27 son confirmadas.

 

La decision d’aver pas cap de contacte amb d’autres pòbles, originaris o forastièrs, es fòrça probablament deguda al fach que se remembran las atrocitats patidas per lors ancessors, dont de masèls e quitament l’esclavatge, segon l’organizacion Survival International.