Los juristas van promòure l'usatge de l'occitan dins los tribunals de Vielha. Se pausarà doncas d'afichas qu'informaràn los abitants de lor drech d’emplegar la lenga del país, e tanben se donarà de paquets de benvenguda als jutges a mand de venir en Aran per lor far conéisser la realitat lingüistica del país, çò rapòrta Aue TV.
 
L'iniciativa seguís la jornada d'estudi e de debat que se faguèt aquesta dimenjada sus la senténcia del Tribunal Constitucional espanhòl que suprimís l'occitan coma lenga d’usatge preferencial per las administracions. Los participants ne concluguèron que l'usatge de l'occitan es deficitari dins l'encastre juridic, e se decidiguèt de prene de mesuras. La jornada l'entamenèt l'Institut d'Estudis Araneses-Acadèmia Aranesa de la Lenga Occitana (IEA-AALO) amb l'Illustre Collègi dels Avocats de Catalonha.