Milèrs d’aranesi que reclamen aué, en ua jornada revendicatiua, esportiua e hestiua, er usatge sociau dera lengua occitana en país de cap de Garona. Se tracte dera 25u edicion dera corsa Aran per sa Lengua, ua manifestacion revendicatiua ena quau fòrça aranesi trauèrsen era Val, a pè o en tot córrer. Es correires que gessen de Les, de Montgarri o deth Pòrt de Vielha e que s’amassen ath ser ena plaça de Vielha. Aquiu que se i amassen normauments un milèr de persones, e dempús des actes e des discorsi, un brave e animat concèrt de Nadau que claue ua jornada que cada an ven istorica.
 
Aué tot eth país aranés marche des tres punts dera Val entà trapar-se ena plaça de Vielha. Aquiu qu’arribaràn en tot carrejar es terçons, que permeteràn de dessenhar era mapa dera Val ena Plaça dera Glèisa.
 
Era marcha qu’ei organizada peth collectiu Lengua Viua, entà revendicar er usatge sociau der aranés.
 
Era principau hònt de sòs entà finançar er eveniment qu’ei era venda dera camiseta dera corsa, qu’ena edicion d’enguan ei dessenhada per Aleix Filloy Cavero.
 
Era corsa que compde cada an damb mès compatriòtes de Garona enjós, que vien tanplan a botjar-se per aranés, qu’ei, fin finau, eth nòste occitan.
 
 
 
Partejar era corsa sus Facebook
 
Enguan, ara ocasion deth 25u anniversari, Lengua Viua lance ua crida a toti es participaires entà partejar toti es moments dera jornada. En aguest sens, que demanen de publicar ena pagina Facebook de Lengua Viua totes es fòtos, vidèos, imatges, etc. sus eth desvolopament dera corsa en tot caminar, en es moments de pòsa, ara ora deth dinnar popular...
 
“Imatges que siguen ua mòstra dera hèsta dera nòsta lengua e der esperit que toti viuem eth dia dera Corsa d’Aran per sa Lengua”, çò demane era còlha de Lengua Viua deth temps que precise que non se publiquen imatges damb connotacions politiques o que non tòquen era Corsa d’Aran per sa Lengua.
 
 
 
 
 
FM