Francés Boya, mès coneishut coma Paco Boya, ei un politic, escrivan e musician aranés. Actuauments ei senador pera Entesa peth Progrès de Catalonha e ei estat còsso der Ajuntament de Les e Sindic d'Aran. Ei autor de Era Val d'Aran (1995), L'alè del bosc (1997) e Presoèrs dera mar gelada (1999), òbra pera qu'arrecebèc eth Prèmi Les Talúries en 1998, era medalha Vila de Luishon (1998) e era medalha Stéphen Liégeard (1999).

 

A collaborat en diari Segre e ena revista Descobrir Catalunya. Siguec director deth programa Era lucana, de Television Espanhòla (1989-1990). Ei membre dera associacion culturau Es Corbilhuèrs de Les, dera associacion Lengua Viua, dera Fondacion Musèu Etnologic dera Val d'Aran, dera Associacion Recreatiua de Les, e soci deth Club Aranés d'Espòrts d'Iuèrn. Ei musician fondator deth grop Bramatopin.