Conselh Lingüistic de Jornalet

S’es agut dich que Jornalet es un dels còrpus textuals en lenga occitana mai importants del sègle XXI, per la varietat dels subjèctes tractats, pel modèl de lenga emplegat e per la coeréncia lingüistica dins l’aplicacion d’aqueste modèl.
 
La qualitat e la coeréncia de la lenga emplegada a Jornalet son pas casualas: i a darrièr elas lo trabalh prigond d’un Conselh Lingüistic qu’aplica rigorosament la nòrma establida per Alibèrt, Lafont, lo CLO (Conselh de la Lenga Occitana), demest d’autras sorsas, dont per exemple l’òbra lexicografica de Frederic Mistral. En mai de l’aplicacion de la nòrma, lo Conselh Lingüistic de Jornalet pren de decisions per resòlver de problèmas que s’èran pas jamai trobats (cossí escriure en occitan estandard un nom de vila? Quina tipografia adoptar? E los neologismes? etc.).
 
Long dels 5 ans de son existéncia, Jornalet a començat de fargar, per l’amolonament de totas las causidas fachas —e mai informalament, d’en primièr—, son pròpri libre d’estil.
 
La còla de Jornalet avèm pensat que, del meteis biais qu’aqueste libre d’estil que s’es a escriure jorn après jorn nos guida dins la redaccion de nòstres articles, tanben poiriá èsser una aisina utila pels usatgièrs especializats (professors, jornalistas...) e tanben pels usatgièrs abituals, que trabalhan pas amb la lenga, mas que vòlon resòlver d’un biais practic lors questions lingüisticas.
 
Es evident que, amb aquò, avèm pas la pretension de generar una nòva nòrma. Es pas necite. La nòrma ja existís e, cossí que siá, es pas la tòca d’un jornal de la fargar, mas de l’aplicar. Çò que volèm far es expausar publicament nòstras causidas, balhar las sorsas de las decisions lingüisticas que prenèm, e —perqué pas?— convidar lo lector de Jornalet a las aplicar, el tanben.
 
E mai l’organizacion d’aqueste repertòri siá pas aisida, volèm començar d’establir un debat public sus l’usatge jornalistic e quotidian de la lenga occitana. Per ansin, volèm dobrir un espaci ont los legeires pòscan pausar de questions sus las causidas e los critèris de Jornalet. Incorporarem pauc a pauc las responsas dins nòstre “Libre d’estil dobèrt”, que bastirem amassa, legeires, jornalistas e lingüistas.
 
Mandatz vòstras questions al corrièr electronic clj(a)jornalet.com e periodicament publicarem la responsa de nòstre Conselh Lingüistic.