Los projectes beus d'infrastructuras vòlen estructurar nòstre espaci per ajudar lo monde dins sos desplaçaments: viaduc de Milhau, autorota Pau-Lengon, LGV en Lemosin, Provença, Gasconha, tuneus dins los Pirineus o los Aups... Tots quilhs projectes son, pertant, de mai en mai contestats, mai que mai per los ribairòus. D'efiech, an un impacte important sus l'environament. Còpen los territòris, l'escolament naturau de l'aigas, los desplaçaments de la sauvatgina, bela e petita, e destrusen lors abitats.

 

De segur, dins los bureus d'estudis, trabalhen a evitar, redusir e finalament a compensar quilhs impactes. L'aiga d'un bacin idrologic interceptat deu èsser restituada après l'infrastrucura, daus passatges per la sauvatgina son creats, e los abitats destrusits son tornats bastir quatre còps mai beu. Quelas mesuras son malaürosament pas totjorn eficaças (meschanta implantacion d'un passatge per la sauvatgina, sistema de recuelh de l'aiga pas entretengut, abitat noveu pas colonizat).

 

Adonc, perqué, quilhs projectes? Son mai que mai una chausida de societat, una vesença dau monde. Vivem dins un monde globalizat, ente los eschamnhes son quasi instantaneus mercés a Internet e ente la mobilitat es la regla. Se fau poder desplaçar de mai en mai regde d'un endrech a l'autre, d'un continent a l'autre, suventas vetz per nonmàs quauquas oras. Lo monde es constituat de nos de transpòrt multimodaus (gara TGV, aeropòrt, autorotas) reliats a de las metropòlis que, en França, auràn leu leu lor estatut especiau. Las aglomeracions de mai de 500 000 abitants podràn se constituar en metropòli emb las competéncias de las comunas, mai las dau departament e una partida de las de la region. Projecte de la reforma territoriala de Nicolas Sarkozy que sirá pas abandonat per lo candidat socialista a la presidenciala si es elegit.

 

Quantben de metropòlis en Occitània? Quatre vilas semblen aver de las comunautats urbanas sufisament popladas per poder ne'n venir: Marselha, Tolosa, Niça e Bordèu. Quatre vilas emb vocacion a se connectar au monde mercés aus mejans de communicacion los mai modernes e los mai rapides. Quatre vilas ente se concentraràn las entrepresas, adonc l'emplec, e per consequent la populacion. Lo demai dau territori occitan? Podrá contunhar dins sa vocacion agricòla o toristica, un endrech ente los vilauds se vendràn passar la dimenjada per se pausar.