Opinion
Chornobyl, Fukushima... a quau lo torn?
Lo 26 d’abriu passat, era la jornada internacionala de commemoracion de l’accident nuclear de Chornobyl. Ujan, auriam pogut chamnhar l’eslogan “jamai pus” per “un còp de mai”. D’efiech, lo 11 de març 2011, un terratremol a 130 quilometres de la còsta dau Japon, d’un magnitud de 8.9 provoquet lo mai important tsunami que l’archipel coneguet mai. De las ersas de mai de 10m que penetreron d’acianta 10km dins las terras, que fagueron daus milliers de mòrts e de dispareguts, daus degalhs importants e mai lo segond accident nuclear lo mai greu de nòstra istòria. Vint e cinc ans, a dos mes pres, apres lo de Chornobyl.
Me rapele de çò que disiá mon professor en risca industriala: “Tot çò que podetz imaginar, pòt ‘ribar! Adonc, zo fau preveire. De tot biais, çò que ‘ribarà es quauquaren qu’auretz pas imaginat.” Los engenhaires japonés aurián pogut imaginar una ersa mai bela que los 6m per los quaus l’installacion era previsda. Aurián pogut imaginar una de 15m. Mas, de quantben nauta serà la seguenta?
Adonc, pòden ben parlar los dau lòbby nuclear francés. Son los melhors de segur! Quò ‘ribarà jamai en França, an tot previst. Tot? Un terratremol en Provença o en Alsàcia? Un atemptat? Una error umana? L’impossibilitat de refregir una centrala fàcia un eveniment climatic piéger que lo de 2003? De tot biais, çò que ribarà serà de pas creire.
Veiquí lo problema essenciau de quela energia. Son poder. Coneissem son poder destructor, fondament de l’equilibri geostrategic dempuei la segond partida dau segle XX. E coneissem lo dangier de queu poder dins son utilizacion civila. Vòle quitament pas parlar de competéncia daus tecnicians e engenhaires, de capacitat a mestrejar la tecnologia. Lo poder de quela energia nos permet pas la mendre error. Pertant, una regla en seguretat industriala es la seguretat intrinseca dau sistema. Aicí, serem totjorn jos la menaça de l’accident, qu’aurà de las consequéncias planetàrias e mai sus daus segles.
Risca socialament acceptada, e fòrça mai acceptada que la de las eolianas - qu’es de se préner una pala sus lo morre, condamna las generacions futuras a viure las consequéncias de chada accident e a gerir nòstras sòbras radioactivas. La question vertadiera es pas de saubre si fau sortir dau nuclear o pas, mas en quantben de temps.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#2
"M'estonariá que fuguèsse la consomacion privada la responsabla!"
A jo ne m'estoneré pas : véser per exemple la holia de la climatizacion...
#1 D'efiech, Jan Peire, a Blaia se passet un incident qu'auria pogut menar a un accident dau tipe de lo de Fukushima. Una inondacion que provòca 'na pana dins lo sistema de refregiment dau reactor, çò que nos mena a sa fusion e donc a una explosion dau reactor (e de çò que n'i a l'entorn...).
#2 Per çò qu'es dau comerci a l'entorn de l'energia eoliana, ai pas de chifras precisas. Mas, ai desja auvit daus oposants ne'n parlar. Quò siria un bon comerci, e lo deveslopament de l'eolian sirià mai que mai menat per los industriaus dau sector, mai que mai per se far daus sòus. Cò que m'estonaria pas. De segur es un aspect que fau pas obludar, mai que mai per 'na politica publica ecologica. Mas bon... lo nuclear es tengut per un lòbby militaro-industriau d'Estat e quò me sembla pas mins problematic.
Per çò de la consomacion electrica en França, las chifras de RTE (Ret de Transpòrt d'Electricitat) per 2011 pòden balhar de las indicacions. La consomacion entre 2010 e 2011 a globalament baissat maugrat son aumentacion dins los sectors de las PME-PMI. Disen qu'es per que faguet pas tròp freg. Adonc, me sembla que n'i a un vertadier impacte dau chauratge electric de las maisons. Emb l'ivern qu'avem 'gut, sei segur que la consomacion electrica aumentarà en 2012 (coma las d'autras energias).
Se voletz mai d'informacion : http://www.rte-france.com/fr/actualites-dossiers/a-la-une/rte-publie-le-bilan-electrique-2011
Èi aimat la reaccion de las autoritats per l'accion de Greenpeace a Bugey aquesta setmana : "La suretat de las instalacions estó pas mesa en causa". Pffff....
En brac, qualques questions e remarcas:
Per çò de las eolianas, sèmbla qu'es un comèrci chucós per d'unis que i a. Jamai degun ne parla pas d'aqueste aspècte financièr. Òm se concentra sonque sus l'aspècte environamental.
Perqué la consomacion d'electricitat augmenta dempuèi annadas ? E es pas una pichòta augmentacion!
Se prèni l'exemple del miu ostal, fa 20 ans que consomissem al meteis nivèl! Perqué França globalament consumís mai? Es lo sector industrial ? Segurament! M'estonariá que fuguèsse la consomacion privada la responsabla! Mas çò segur es que totis devem susportar los riscs nuclears!
E quand vesi que la candidata ecologista fa sonque 2%, aquò me fot la ruca.
Acabarem per crebar la gula dubèrta en mercejar los que nos auràn panat la moneda, puèi empoisonat.
http://fr.wikipedia.org/wiki/Fichier:Electricity_production_in_France.PNG
Visca la creissença regulada! Visca la descreissença controlada!
Adiu,
França a pas tot prevut.
Manca de gaitar la tempesta de 1999. Sauv error, de l'aiga entret be dins la centrala de Blaye (sabe pas lu pitit nom occitan). Ad un punt que, iò legiguí beleu en un limerò de « la descreissença » (jornau), la prefectura se pausava la question de far eisir dins l'urgença, evacuar l'aglomeraci' de Bordeu.
Non, sem pas vertadièrament preparats.
Vive alentorn de 2 grands sitís nuclearisats, fòra los « ecolos » e lu mitan « surtir dau nuclear », la gent gaitan alhors.
JP Bertrand
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari