Opinion
Complòt mediatic
Segon las règlas de la democracia qui coneishèm, mentre ua votacion, una votz ei egau a ua auta votz, ua hemna de servici compta autan que non pas lo president de la societat on tribalha. Cadun pòt votar segon sas conviccions e ... las informacions que possedisson. E qu’ei aquiu precisament la teoria e la practica se desseparan. L’elector analiza lo monde qui l’entorneja capvath las informacions qui recep. E las informacions, l’elector las recep capvath los mèdias. Sustot la television, plan mei que non pas los jornaus, la ràdio o la telaranha (Qui progessa totun). Lavetz, entà que l’elector posca plan causir, cau que sia plan informat. Sabi dejà çò qui pensatz: "Uei lo dia sèm suber-informats". Segurs?
Prenguerèi sonque un exemple. Cada dia, cada matin e cada ser los mèdias que’ns cantorlejan un subjècte omnipresent: lo deute estatau. E segon eths, n’existís pas qu’ua solucion: abaishar las depensas, lo debat que’s pòrta sonque suu biaish d’ac hèr. E la quita hemna de servici que n’ei convençuda, puishque son "especialistas de hauta volada" qui ac dison a contunhar. Ne mancan pas los reportatges suu caumatge en Espanha o los suicidis en Grècia. E l’Islàndia, lavetz? Non pas ua linha, non pas ua minuta consacrada ad aqueste país europenc (N’ei pas sòci de l’Union) non pas tan luenhèc qu’aquò. Lhevat lo volcan, solide. La solucion presa peu pòble islandés n’estoc pas comentada, e totun: après manifestacions massivas, la carrèra a hèit desmissionar lo govèrn sancèr (Ad aqueth estadi, lo mèdias francés ne hasèvan enqüèra lo rebomb dab lo comentari: "Crisi en Islàndia".) Après eleccions navèras, lo govèrn frescament elegit a prepausat ua lei qui organiza lo pagament deu deute (3.500 milions d’euros) per las familhas islandesas pendent quinze ans dab un taus d’interés de 5%. Lo pòble tornèc devarar a la carrèra (2010) e impausèc un refréndum sus la question. La lei estoc refusada a 93%. Devath la pression de la carrèra, la polícia entamenèc ua enquèsta dens los mitans financèrs: tots los banquièrs implicats deishèn lo país. Uns responsables de la crisi eston empresonats, las bancas eston nacionalizadas. Lo pòble elegiscoc ua amassada de 25 personas non afiliadas politicament au demiei de las 522 personas qui s’èran presentadas. Qu’an adara lo dever de collectar los avís de las amassadas popularas creadas dens lo país sancèr entà escríver una constitucion navèra (2011). Ua aplicacion pròcha deus principis de la democracia dirècta, la qui avèva saunejat J.J. Rousseau au temps de las Lutz.
Lo silenci deus nòstes mèdias ei estat eishordaire sus aqueste subjècte. Un còp de mei, la question n’ei pas de saber se la solucion passa per la carrèra (Ei un debat aute e cadun ne tirarà las conlusions que vòu), mès de saber pr’amor quauquarren qui’s pòt qualificar de "complòt mediatic" se posca debanar dens ua societat presentada coma evoluada e liura. Pr’amor i a avut un million de còps mei de reportatges sus l’arribada deus pandas au zoo de Beauval que non pas suus eveniments d’Islàndia?
Lo còp qui veng, quan veseratz au finestron sus TF1 un reportatge sus dròlles en vacanças a la neu dab l’entrevista entad-aquò-hèit per díser que la neu ei meilèu freda e molhada, brombatz-vos de l’epòca quan, en Polonha, las susmautas obrèras usclavan las carrèras de la vila de Gdańsk mentre lo monde de las vilas vesinas ne’n sabèvan pas arren, demandatz-vos dens quin sistèma sèm, e se n’i a pas ua solucion "a l’islandesa" de causir entà ne sortir.
* Parlarèi de rugbi cada dimars e de societat cada purmèr dimenge deu mes.
* Parlarèi de rugbi cada dimars e de societat cada purmèr dimenge deu mes.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Complètament d'accòrdi ambe vos , e doncas se aquelses medias parlan, pas cap de la reaccion del pòble islandès , aquò pausa question aquela abséncia de question .
Aquela analisi pròva plan que i a una mena de complicitat objectiva entre totes los mejans de comunication per parlar , pauc o pron , a la meteissa ora , dels meteisses subjècts, ambe los meteisses mots.
Ieu teni una teoria complicada e simplòta a l'encòp, ( que lo subjèct m'interessa fòrça) coma de que s'agis ara pels monde capitaliste de recaptar tot çò qu'an degut donar , aprèp la darrièra granda guèrra en facia de la menaça comunista , plans Marshall , e autres, aprèp subretot lo programa del CNR. S'agiria per elses(lo monde liure) de començar de recaptar lo retorn sus investiment, aprèp lor capitada e lo fracatge de l'URSS, mas que tot aquò lor costèt la pèl del c... Mas lo pus grèu coma o podrià mòstrar los eveniments curios de nòstra Santa Maira La Gleisa de Roma seria que las Mafias ajan jà trapat lo poder.
Alara quora ( e de longa) se parla de deute cal saupre , que s'agis d'en primièr , mai que mai de l'interès del deute , es a dire de l'argent prestat per las bancas, argent que van cercat prèp d'Euròpa a 1% , e que lo mai bel, aquò's que s'agis subretot del nostre argent bel estalviat , que tota aquela engana, data del regretat Pompidou en 1973, que volguèt la lei coma qué , l'Estat devia manlevar pas qu'a las bancas privadas, e que podia pas cap manlevar prèp de la seuna banca centrala e estatala. ( sado maso qué...)
Del meteis biais e autre curiositat mediatica consi se fa que se parla pas mai de la Libia , la Tunisia, l'Iraq e autres païses venguts fòrça islamics mercès del monde liure .
Autra estrangetat , de la meteis draia: quala es la diferéncia entre l'Espanha de 1990 (ambe la de 1933), o se volètz ambe la Yugoslavia abans qu'espetèsse , e consi arribèt (se bastis? ) una guèrra civila? La pròva n' es donada auèi ambe la Siria, sufis al "monde liure" de donar las armas ont cal e far aital amadurar qualques banhs de sang plan causits e aprèp l'afar marcha tot sol. Aquò dich non pas per perdonar a un dictator , ( qu'es pas pieger ni melhor que Hussein o lo rei d'Arabi o Gadafi, o Aliev ) mas per explicar que lo "monde liure" pòt far endevenir una guèrra e quitament la demanda e l'independencia ont vòl , o barrar tota possibilitat de libertat e d'independéncia ( Euskadi, Catalonha , Corsa , Escossia ? Occitania? Bretanha, Berbers, Toaregs,
Se Turquia nos em... donarèm d' armas als Kurdes de Turquia e farem petar qualquas bombas a Ankara. Se los Chineses començon de tròp em... los USA armarem lo Tibet e puèi farem petar qualquas bombas a Shangai . Aprèp serà lo banh de sang irreversible. Los medias seran totjorn aqui per denonciar las mostruositats del regim en placa o dels revolucionarias .
Del meteis temps i a un chaple al Congo Kinsasha , dins Somalia , dins Sri Lanka, ece....qual ne parla?
Tot aquò per dire qu'es impossible ara de creire las paraulas dels jornalistes , pas mai la de los que pòrtan lo "senhal" de pais pas liures. Que las manipulacions mediaticas son la rason de viure del jornalisme d'investigeishun o pas . Qu' ajudan d'un biais o d'un autre a la manipulacion
Ambe Wikileaks ( Assange accusat d'aver violentat doas onèstas maires de familha prostituidas quitament ambe un capuchon de boligraph! me trufe mas es pas de creire) avem vist d'un intervio, ambe dos jornalistes del Monde qu' an refusat quitament de parlar de las revelacions d'Assange , per de qué lor deontologia o demandava , que lor calia de temps per verificar las sorgas , pas cons los jornalistes franceses, e pas vergonhos; sai que de agents dels RG . Tot se passa coma ambe l'escandal del Vatican . Es escandalos mas ne'n saurem pas mai Rai ..................... Ras
Uèi sabem que JFK èra pas qu'un femnassièr alara que lo monde lo plorèt coma Dius lo paire lo jorn de sa mòrt. Que Clinton èra un brave femnassièr , que Giscard dintrava cada matin a cinq oras , que Mitterand fasia espigar cada femna polida que passava ; que Chirac sautava sus tot que portava una rauba . E nos dison que DSK es pòrcassièr . Auria pas votar per el , mas se foton de nòsautras. Pel còp finirai per creire qu'èra vertadièrament d'esquèrra lo DSK o qu' a degut s'enganar e se jaire ambe la femna del pairin de la mafia.....
Mas nos an contadas tant d'asenadas los medias ...
E lo chapla de Tolosa. De que devenguèt lo garçon nhafrat espitalisat a Rangueil?
Es verai. I a un eissorbament dins lei grands mèdias qu'es de natura ideologica. Tanpauc parlèron quasi pas de la manifestacion per la lenga occitana dau 31 de març, a Tolosa, ont i aguèt 30 000 personas. Ai grands mèdias li agrada mai de parlar dei manifestacions de 30 o 100 personas a París.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari