Opinion
"Archange foudroyant". Lo virar pagina e la memòria brèva
Lo virar pagina aquò’s un exercici costumièr de la cultura politica francesa. Permet alencòp d’escafar la memòria quora ven tròpa complexa e de defugir tota responsabilitat istorica. Lo virar pagina unilateral permet de demostrar a l’Autre (l’indigèna d’un còp èra) que demòra embarat dins son passat, incapable doncas de participar gaujosament a l’avenidor qu’avem fargat, nosaus, per l’umanitat. Operacion de blanquiment e de virginizacion.
Atal los esveniments son afrontats son que per lo biais afectiu, emocional: podetz denónciar aisidament la barbaria de l’Autre sens vos botar en question. La bona civilizacion aquò’s la vòstra, çò qu’es estat recentament afortit per lo Ministre de l’Interior, d’un biais implicit: totas las civilizacions se valon pas!
Una tragèdia escai: emocion (òm compren pas!), puèi qualquas analizas a partir d’una memòria corteta (se pòdon pas admetre las nòstras contradiccions). Una autra tragèdia escai, aicí o endacòm mai qu’escafa la precedenta e zòu, fai-tirar ! Cap de ligam.
Atal n’es de la tragèdia recenta de Tolosa e de Montalban de portada alencòp locala e internacionala.
L’actor es francés, es un problèma francés.
L’actor es d’origina argeriana, es tanben un problèma francò-argerian. Del temps que se commemorava lo cinquantenari dels Acòrds d’Evian de 1962, non sens reticéncias e contestacions costat francés. Pagina virada non virada.
L’actor es de Tolosa, es un problèma tolosenc. Consternacion, atupiment! Cossí se pòt produsir tala tragèdia dins una ciutat que se vòl exemplària istoricament dins son biais d’acuelhar e d’integrar. Onte n’es la convivéncia? Una pagina es a se dobrir.
L’actor a viscut dins de barris "sensibles" coma se ditz. Çò que vòldriá dire que i a de barris "insensibles"! Aqueles barris serián pas de fach de non-lòcs de memòria? Ont n’es la capacitat d’escota de la societat francesa? Pagina virada o pas.
L’actor es jove, es un problèma de societat francesa. Quin avenidor reservam a la joinessa e dau mai d’origina magrebina o autra? Pagina sempre doberta...
L’actor a viscut un fracàs familhal, coma tantes: ont es lo paire? Tornat en Argeria. Fractura dins lo processus d’emigracion. Ont n’es l’eretatge linguistic e cultural dels filhs? Esquiç societal.
L’actor era pron armat. Las armas se pòdon doncas obtèner prona aisidament. Podem pas doblidar que França ten dins lo mond lo tresen rang coma país produseire d’armas. Pagina amagada.
L’actor s’es referit a l’organizacion Al Qaida (sem aquí a un nivel internacional) sus dos punts:
- l’engatjament de França en Afganistan. Tres militaris d’origina magrebina e creòla ne seràn las victimas). Lo President de la Republica nos aviá assabentats que los soldats defendián aval las valors de França e de l’Occident. Quinas son aquestas valors republicanas? Ont n’es l’imperialisme "occidental"? Pagina virada o pas?
- lo problèma israelò-palestinian. Ont n‘es la realizacion d’un Estat palestinian fàcia a la colonizacion de poblament? L’actor a volgut tuar d’enfants, acte de desumanizacion de non admetre, tan coma aquel d’Oslo que mutilèt l’avenidor en assessinar la joinessa. L’actor tolosenc auriá volgut vengar los enfants palestinians? Fantasma? Pagina virada per d’unes, pagina doberta per d’autres: al nom de quina ideologia deuriám escafar l’operacion de l’armada israeliana de genièr de 2009 (apenas tres ans e dins lo periòde prevotacional als USA), operacion dicha "Plomb durci" denonciada a nivel internacional: espitals e escòlas bombardadas? De centenats de dròlles i foguèron tuats e l’afar s’arrestèt son que amb la nominacion del Président Obama.
Virar pagina d’acòrdi, mas jamais tròp a la lèsta per poder melhor desmargar la mecanica del malastre. La cal primièr plan legir e analizar totas sa contradiccions. Si que non, per quora la tragèdia venenta? A l’ora d’ara l’organizacion Aqmi (que se reclama d’al Qaida) es a s’installar al còr de l’ancian dispositiu colonial francés african (la Françafrica es pas acabada). Aquí ont l’armada francesa menèt l’an passat l’operacion militara nomenada "Archange foudroyant" (genièr de 2011, Niger). Per de qué una tala referéncia religiosa?
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Caleré hornir a la lista : l'actor èra un agent de las Entresenhas Francesas e n'en sabèm pas mei pr'amor ei estat executat lavetz que res ne l'impausava pas (Es lo purmèr còp que policièrs son estat medalhats per un fisaco totau) .
Deu quau actor parlam ? Deu Mohammed Merah o deu tipe "petit, corpulent, deus uelhs blaus dab ua creta sus la gauta" deu quau parlan los tetimònis ?
Sufís pas sonque de léger la Despatcha (Quin n'ei pas, cresi, un jornau salafista) per n'aver de dobtes bèths sus la version oficiau, conhida de causas de non pas créser.
Soi prèst de díser que lo Merah n'a pas tuat degun, ne'n soi pas segur au cent deu cent, mès, botèm, a nauanta-cinq ....
La violéncia, la de l'OTAN, la de l'armada israeliana, la de la globalizacion neoliberala, pòt pas engimbrar res mens que la violéncia. Sonque l'amor engimbra l'amor. Mas cossí amar los e las que coneissi pas ? Cossí los amar sens los entendre plan. Sens que m'entendan, ieu meteis, dins ma lenga e dins ma cultura, dins ma dignitat. Dignitat nas e nas amb dignitat, dins una bilateralitat rigorosa ! Aquí l'avenidor. L'escambi coral dins la convivencia, o l'ataüc finala, aquí la causida. Aquí lo messatge de la civilizacion d'òc e d'Al Andalós. Qual nos entendrà ?
Poiriam prepausar a Israel e Palestina de se fondre en un cèrte "Comtat ramondin de Tripòli" : un estat rigorosament laïc que totes leis estanjants, crestians maronitas, musulmans sunitas e chiitas e josièus, e mai atèus, i serián ciutadans a egalitat absoluda. Lo modèl francés non i poiriá pas capitar : estant que i caldriá al mens tres lengas cooficialas : arab, ebrèus e aramean. Lo messatge e la civilizacion occitana romanica leis poiriá ben sauvar, mas cal nos entendriá, a l'ora d'ara que sèm venguts transparents ?
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari