Opinion
Pialèrs de sòs e pòqui mieis
“Artur Mas gasta 700.000 euros en promocionar el aranés”. Aguest titolar deth 17 de mai der airau digitau de La Gaceta non poirie èster mès errat e sensacionalista. Coneishent era linha conservadora e espanholista deth jornau, an aprofitat era concesion de subvencions as mieis de comunicacion per part deth Govern catalan entà alugar es critiques contra era Generalitat.
Quan se dan informacions fausses segondadi còps, er abitud se convertís en norma. Donques fòrça gent –o ua part dera massa– s’a empassat aguesta noticia. Es persones an tot eth dret a opinar çò que volguen de quinsevolh ahèr, mès an eth déuer d’estar ben informats.
Entà començar, era soma des ajudes as televisions puge enquia 667.250 èuros, e as ràdios, 493.700. Eth totau des dues chifres acreish a mès d’un milion a repartir naut en baish de Catalonha. Dempús d’analizar es numeròs deth comunicat oficiau dera Generalitat –ath que tot eth món pòt accedir damb pòc mès que un ordinador e internet–, sonque quate mil èuros amien directaments entà un miei de comunicacion aranés. En concrèt era empresa Catalana i Aranesa de Telecomunicacions, responsable de Gum FM.
S’estiram un shinau era còrda, i a pòc mès de vint mil èuros entà Lleida TV, qui emet es contenguts d’Aran TV. Non ei eth miei aranés qui recep es sòs. A despiet d’açò, en pòt trèir bèth profit… non guaire naut per aquerò; donques era subvencion non ei cap fortuna.
A on son es 700.000 èuros qu’afirme La Gaceta? Shaute vèir era reaccion de pour e panic: “Artur Mas sigue en sus trece de fomentar el catalán y el aranés en contra de la lengua española”. En un univèrs parallèl e de condes fantastics, ei possible qu’er aranés sigue ua lengua que predomine sus eth castelhan. Mès non en aguesta realitat que de bona o mala encólia mos tòque víuer.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Es clar qu'un estat imperialista farè sempre la promocion de sa cultura sus las autras/dominaas, convençut de sa superioritat culturala. E que de mai "logic" per el que de denonciar que i aie sempre de tròp per las autras culturas.
Lo nivèl dal financiament es l'exemple lo mai scientificament quantificable (subvencions per los mèdias/ las edicions en lenga non imperialista). Mas n'avem d'autres, mens quantificables (restriccions d'usatges linguistics dins la societat, accès dals locutors a l'emplec, etc.). Donca i serà sempre dos peses diferents entre la cultura imperialista e las autras.
Dins aquela situacion, la conoisséncia de l'autra cultura es inegala en rapòrt de la conoisséncia de la cultura de l'empèri. La cultura de l'empèri es aquela qu'a los meians de se far conóisser.
Per aquò, l'empèri veirà l'illustracion qu'a ben rason de pensar a sa superioritat culturala. Vist qu'a la cultura la mai conoissuá, la mai accessibla "democraticament" al monde. E farè de bilhets per s'en plànher. La bloca es blocaa.
Excelenta rubrica!
La compreneson de las subvencions publicas cap a l'occitan ajuda a se fèr una idèa de la misèria financièra de la nòstra lenga.
Las chifras vertadièras mentisson pas
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari