La 59ena proposicion del novel president Francés Hollande es: "Farai ratificar la carta européa de las lengas regionalas o minoritària".
 
Dins la campanha presidenciala parlèt tanben de modificar la constitution per i suprimir lo mot raça e per i inscriure la lei de separacion de las esglesias e de l'estat.
 
Dins lo sieu discors d'investitura, lo president nòu tornèt dire la siá promessa d'espandir los transferts de competéncia vèrs las collectivitats localas dins un acte lll de la decentralizacion. Aqueste acte lll deuriá ésser presentat dins l'encastre dels estats generals del territòri, mes en plaça pel president del senat, Jean-Pierre Bel. Lo debat se deuriá faire aqueste auton. Las evolucions deurián portar sus una reforma de la fiscalitat locala, sul mòde d'eleccion dels elegits territorials amb la supression del conselhièr territorial qu'auriá degut fusionar conselhièr general e regional, e mai, subre un espandiment de las competéncias regionalas en matèria d'emplec, de formacion e de politica europèa, tal coma la politica agricòla.
 
Las nominacions als ministèris mòstran tanplan que de reformas institucionalas majoras son de prever. Lo discors de J-P Bel a la conferéncia de premsa del 31 de març coma representant de F. Hollande a la manifestacion occitana mòstra una enveja clara del president del senat d'avançar dins la decentralizacion e de promòure una lei per las lengas de França.
 
Se las eleccions legislativas son favorablas a l'esquèrra, amb una majoritat dins las doas cambras, lo govèrn sap que poirà modificar las institucions favorablament subretot dins los 6 primièrs meses de sa mandatura.
 
D'un autre latz, aquelas darrièras annadas, los elegits territorials que volguèron far avançar la lenga e la cultura occitana mostrèron que força causas se pòdon faire al nivèl regional, departamental o comunal tal coma en Aquitània, Avairon o Tolosa.
 
Per far avançar politicament la socializacion de l'occitan, cal trabalhar a dus nivèls:  
Se lo govern nòu a una majoritat en junh, una oportunitat per far avançar la lenga se presentarà al quatren trimestre de 2012 amb de modificacions de la constitucion qu'incluga la reconeissença de las lengas de França. Aprèp la manifestacion per l'occitan e las autras lengas de França del 31 de març, l'accion per l'occitan deu se concentrar per ara sus un objectiu: interpelar deputats e senators per que las lengas de França sián dins l'agenda politic de la dintrada parlamentària de l'auton de 2012. Interpelar los parlementaris, vòl dire mostrar una demanda sociala dins lor circonscripcion.
 
Lo mond occitan saupèt s'organizar per botar 30 000 personas dins una ciutat granda coma Tolosa, ara cal botar aquela organizacion per pesar sul trabalh legislatiu. Caldriá installar dins cada region e ciutat granda d'Occitània de comitats occitans per una lei per l'occitan e una vertadièra descentralizacion en 2012. A cada comitat local de trobar sos mejans d'accion, dels corrièrs als elegits als events simbolics e mediatics locals tal coma de repais de carrièras occitans. A una coordenacion de los representar al senat e al parlament.
 
Lo cambiament politic qu'esperam per la lenga del territori nòstre es juste e democratic, mas se farà sonque s'organizam una demanda sociala. Uèi, las energias nòstras se devon pas focalizar subre una cinquena manifestacion granda en 2014 mas subre la visibilitat pels parlamentaris d'una demanda sociala per la lenga occitana e tanplan per un acte màger de decentralizacion de l'estat francés. Per espandir la basa sociala de la demanda occitana, cal espandir la revendicacion nòstra a la decentralizacion que permete una eficacitat melhora de l'accion politica de proximitat, revendicacion que rescontra un sostenh popular mai larg.
 
Coma aquela demanda sociala deu èsser vesedoira tre l'auton, lo mai eficaç seriá de tornar mobilizar totes los grops qu'organizèron la manifestacion del 31 de març per ne faire de comitats de ciutadans occitans. Anem òc per la lenga occitana, mas ara per bolegar deputats e senators nòstres dins cada recanton d'Occitània per que prengan posicion subre la lenga occitana e de poders vertadièrs per las regions nòstras.