Merton ei ua region plaçada en sud-oest dera comarca de Londres o Greater London. Eth ligam e relacion qu’a damb eth cap-lòc ei fòrça notable pr’amor dera “escassa” distància que i a d’un a aute parçan (mièja ora).
 
Pr’amor d’açò, Merton, autant coma d’autes viles d’apròp de Londres,  viuen e an viscut d’apròp er impacte e era neishença des subcultures urbanes britaniques.
 
Ua des scenes que mès marquèc ara joenessa de Merton siguec era qu’apareishec a finaus des annades 70: eth Revival Mod, basat enes estereotips e infloenciat pera musica dera sua prumèra ondada a mitat des ans 60.
 
Danny e Mick Talbot, Neil Hurrell e Simon Smith siguèren 4 joeni que, pasionats d’aqueth revival navèth e amorosi dera musica, s’amassèren entà formar ua banda de musica.
 
Neishien alavetz es Merton Parkas, en tot hèr eth jòc de mots damb Merton Park e era “parka”, pèça de vestir fetiche laguens deth mon mod. Enes sòns inicis es gojats s’aperauen The Sneekers mes cambieren eth nòm ath pòc temps de començar a jogar enes pubs de Londres. Siguec en un d’aguesti concèrts quan eth jornalista especializat en punk, Alan Anger, les descurbic en un pub de Clapham, ena region de South London.
 
Ei alavetz quan es Merton Parkas signen contracte damb era casa de disqui Beggars Banquet (pionèra ena produccion musicau de faiçon DIY e especializada en grops de punk britanics en aqueres annades).
 
Eth grup qu’enregistre ua seguida de singles que veden era lutz ath long der an 1979.
 
Eth prumèr que s’apere “Plastic Smile”.
 
Eth dusau single enregistrat pes de Merton serà “You Need Wheels”. Era cançon venguèc er estiu d’aqueth an numèro 40 ena lista de singles britanics. Ei considerada ua des sues mielhores pèçes.
 
En tresau lòc veiguèc aqueth an era lutz “Put me in the Picture”.
 
Era banda que contunhe de jogar peth circuit locau de pubs dera capitau anglesa e en 1980 damb era madeisha casa enregistren eth sòn prumèr e darrèr LP titolat “Face in the Crowd”.
 
Eth disc que comence damb era cançon que li balhe eth nòm.
 
Ath delà de 9 cançons naues, er LP tanben compde damb es 3 singles apareguts en 1978.
 
Pòc dempús qu’eth disc siguèsse en carrèr, es musicians que prenen era decision de separar-se.
 
En 1983, era casa de produccion Well Suspect trè ara lutz un EP damb dus temes inedits: Flat 19 e Band of Gold.
 
Aqueth madeish an era casa de disqui Beggars Banquet trè un 12” nomenat “The Singles” damb 6 cançons apareishudes enes ans precedents.
 
Mick Talbot, eth teclista, que contunhèc era sua carrera musicau en tot collaborar ena seccion d’organ deth disc de The Jam “Setting Sons”, en tot hèr part des Dexys Midnight Runners o de The Boreau.
 
Eth hèt de collaborar damb The Jam produsic que Mick s’amassèsse damb Paul Weller entà formar era banda “The Style Council”.