Vaquí un nom plan coneishut e ligat a l’art sacrat deu rugbi, mès qui sap precisament qui èra aqueth òmi famós shens de n’estar? En tot espiar de mei près, se pòt descobrir ua personalitat a despart ed un hat bèth e tragic, lo d’un eròi romantic deus temps modèrnes.                              
 
L’òmi s’apelava vertadierament Yves Frantz Loys Marie Le Pelley du Manoir, ua seguida de noms petits de tots: un francés, un alemand, un ancian ed un femenin. Per cadun, que serà Yves. Qu’ei l’istòria deu gojat bahida mei dotat ed entenut de la soa generacion.
 
Nascut a Vaucresson (au ras de Versailles) en 1904 dens ua familha nòbla de vescomtes qui demòran a Paris, que harà la soa escolaritat dens aquesta vila, un caminament deus brilhants qui’u miarà dab facilitat dinc a l’Escòla Politecnica on atenherà lo grade de soslòctenent d’aviacion. Que seguirà la soa formacion de pilòt au camp d’Avor, a costat de Bourges. Pas arren ne’u sembrava resistir. Dotat d’ua grana elegança e d’un fisic deus avantatjós, Yves du Manoir que marcarà los qui l’an encontrat.
 
Puish, qu’ei un esportiu complet qui s’i escad dens tot çò qui ensaja: lo tenis, la canoa, la natacion, la gimnastica e l’atletisme dens los quaus brilharà dab aisidèr. Mès serà sustot au rugbi que nòste joen eròi se harà remarcar. Sòci deu prestigiós Racing Club de France, que serà un miei d’obertura poderós qui possedís un truc de pè deus precís. Plan lèu, que serà aperat en equipa de França a l’edat de 20 ans tot escàs, lo purmèr de genièr 1925, au parat de l’encontre França-Irlanda a Colombes dens l’encastre deu Tornei de las V Nacions. Que muisharà lo son talent mentre aquera partida e, tanlèu lo jòc aviat, lo public que l’adòpta: “… la horrèra, qui ne causís pas mès seguís lo son instinct, que’u consacrèc lo son estrambòrd sancèr.” c’escriurà un jornalista de l’epòca. De lavetz enlà, que s’espartirà entre París entau rugbi e l’Escòla de l’Aire entà l’aviacion, on perfeccionarà las soas coneishenças de l’art deu pilotatge. En 1927, que vaserà lo capitani de l’equipa de França de rugbi.
 
Mès vaquí qu’arriba lo dia tragic deu 2 de genièr 1928. Yves du Manoir qu’ei seleccionat entà l’encontre contra Escòcia, mès que l’ac cau refusar pr’amor de la dusau espròva deu son brevet de pilòt militar: un triangle Avord-Romorantin-Châteauroux. Que s’agorrupís dens lo son Caudron 59 e que s’enaira ... N’arribarà pas jamei a destinacion. Lo brum qu’ei espés. Lo pilòt n’a pas nat senhau au sòu e deu seguir ua via de camin de hèr entà’s gavidar. Mès suu camin de la Valterie sus la comuna de Reuilly, lo píbols lo long de l’arriu, amagats dens lo brumei, qu’arrapan ua arròda. Ua brusida de huèlhas e vaquí que s’acaba la vida, braca mès bèra deu Yves Frantz Loys Marie Le Pelley du Manoir, ua figura deu rugbi.
 
La novèla de la soa desapareishuda que segotirà hòrtament lo monde de l’espòrt e, plan lèu, lo sovénguer deu joen prodigi que harà balhar lo son nom a la competicion navèra creada en 1931 peu Racing e dedicada au bèth jòc, tanvau a l’estadi olimpic de Colombes e a d’autes estadis o establiments escolars. Ua pèira quilhada sus la comuna de Reuilly que commemòra l’accident e, a l’entrada de l’estadi deu Racing, que’s pòt véser lo bust d’ua estèla hueitiva rugbistica deu destin excepcionau.