Ath long dera prumèra quinzeada d’octubre, eth defensa francés deth Barça Éric Abidal a realizat un plan d’exercicis de recuperacion fisica a rason d’un càncer de hitge que patic temps en darrèr. Ara demora de tornar-le a veir en tot córrer pera banda quèrra deth Camp Nou, s’acabe de daurir un nau mercat toristic a explotar damb un ambit de captacion a nivèu mondial. A mès, s’era recuperacion deth laterau finalize de bona encólia, a còp segur qu’er exit dera Val d’Aran coma destinacion entà premanir-se fisicaments –non sonque fotbolaires, tanben atlètes de montanha, bàsquet, pilòts de mòtos o coches, eca.– ei assegurat.
 
En dies de vaques endemiques coma es que viuem, pòqui son es clubs esportius de Catalonha e Espanha qu’organizen gires d’ostiu dehòra dera Peninsula Iberica. A mès, en tot auer ath Barça coma actuau equipa de referéncia a nivèu mondiau se daurís era pòrta des Pirinèus a entitats de mès enlà dera gran bassa.
 
Auem ua auferta toristica amplia e de qualitat entà hèr lòc a un gran numerò d’esportistes, a despiet qu’a fòrça des directors d’otèls non les agrade era pudor que dèishe eth materiau sanitari coma eth reflex enes sues infrastructures –molti s’an planhat d’aquerò a boca petita en Tour de França–. Tanben, naues installacions d’espòrts coma eth pabelhon de Vielha o eth camp de fotbòl deth Naut Aran situat entre Arties e Garòs, e un mar de camins entà caminar. Damb tot açò, era Val d’Aran se pòt capvirar en caplòc deth torisme esportiu ena sason d’ostiu, en tot acuelher equipes de quinsevolh cornèr deth planeta.
 
Era rota Abidal. Aguest serie eth producte estela. Ua trauèssa ath long e ample des camins qu’eth jogador francés a completat ena sòn viatge de recuperacion. Des de visitar Montgarri enquia descurbir eth Circ de Colomèrs en tot pujar ath Montarto. Tanben es ostaus gesserien beneficiadi; “Aciu mingèc Abidal eth sòn prumèr plat de sopa barrejada”, per qué non? Pòt semblar ua idèa massa ambiciosa… O massa estonanta, mès tanben shaute qu’eth Ecce Homo de Borja (Saragossa) age arribat ath New York Times. A mès, qui lheuèc era darrèra Champions en Wembley? Enquia es tribus perdudes en Amazones son coneishedores der esfòrç e patiment deth fotbolaire.  
 
I a imatges de television deth laterau en país aranés. E en contèxte de cambi en qué viuem toti èm un shinau lhòcos; ara ei eth moment de dar-les a conéisher ath mon. Sonque manque un neon gigant ena boca sud deth tunèl que digue “Welcome to fabulous Val d’Aran”.