S’acabe er an. En comence un aute entà descurbir. Ei ora d’hèr un listat de desirs entà er an nau. Poirie èster de profit hèr ua uelhada en darrèr entà rebrembar es ahèrs positius e negatius de 2012. Mès coma era balança esvrentarie deth costat dolent, ei mens escoratjant campar en dauant encara que sigue entà un futur utopic, impossible. Coma era interminabla letra entà pair nadau o reis d’un mainatge.
 
Entà 2013 desiri qu’era taxa de caumatge entre era poblacion actiua baishe. Qu’eth tèrme “crisis” desapareishque deth diccionari. Qu’es politics se rebaishen eth jornau. Non tornar a escotar era paraula impòst, donques quan sone sonque puge. Que ministres espanhòus quèiguen en ridicul en assamblees internacionaus per non conéisher mès d’ua lengua. Desiri que Mourinho contunhe en Madrid. Qu’era sanitat e era cultura non se capviren en un luxe. Qu’es sòs de Catalonha non marchen entà Madrid ne d’autes comunitats d’Espanha. E que Catalonha pague çò que deu ara Val d’Aran.
 
Desiri qu’enes escòles deth país s’ensenhe er aranés coma lengua veïculara. Qu’en ostiu non plòigue cada dus dies. Qu’en iuèrn eth paisatge se capère de nhèu. Qu’er aranés gaudisque de mès preséncia enes mieis de comunicacion. Desiri qu’ena net de Sant Joan, er Haro creme es maus esperits. Qu’eth Conselh amplie es sues competéncies. Qu’ena Val dèishen de bastir rotondes. Que non i age pòbles hantaumes. Desiri qu’es toristes s’interèssen per bèra causa mès qu’era nhèu. Que non se destruïsque era identitat dera Val d’Aran.
 
Desiri qu’eth Jornalet arribe a mès persones. Qu’era gent se daurisque a naues musiques e idèes. Qu’eth prètz deth forfait de Baqueira-Beret baishe. Qu’er escritòri contunhe plen de montanhes de papèr e trabalh. Desiri non tornar a trincar-me tres dits deth pè. Gésser damb amics sense rebrembar vielhes batalhetes e lutar-ne de naues. Contunhar en tot escríuer en papèr. Desiri qu’era mia mair-sénher me conde anecdòtes de joenessa ath tocar deth huec dera tumenèja. Qu’ena cara nòrd deth tunèl de Vielha, era atmosfèra sigue unica. Entà 2013 desiri que cap tròç de plastic, ne arrés de dehòra me digue quin ei eth men país.
 
Erós an nau!!