Lo 27 de febrier 1967 es una data encara presenta dins la memòria collectiva còrsa. Aqueu jorn, l’esquipa de França joguèt a l’estadi Velodròm de Marselha còntra una seleccion de jogaires còrs. Lo seleccionaire francés, la legenda Just Fontaine, vouguèt preparar lo rescòntre futur còntra Romania e demandèt a Pierre Sinibaldi de causir un quinzenat de fotbolaires còrs e de jogar segon lo sistèma tactic dei romanés, per facilitar la preparacion dei francés.
 
Mai tot se va pas debanar coma o esperava: davant 25 000 personas, e segur de nombrós còrs de Marselha, l’esquipa de Corsega foguèt mai que motivada e Eric Sansonetti marquèt lo primier après solament doas minutas de jòc. Sansonetti que seriá l’an d’après lo melhor golejaire de primiera division.
 
Se pensava que lei francés accelerarián e dominarián la partida, mai foguèron ben lei còrs lei mai actius e eficaç en aquela partida. A l’ora de jòc, Serra doblèt la marca per lei còrs e la partida s’acabèt sus lo resultat de dos a zèro.
 
Çò que deviá èstre una simpla partida d’entraïnament còntra un adversari inferior venguèt  una umiliacion per lo fotbòl francés. Dau rèsta, França perdèt sa partida còntra Romania un mes puei, e anullèt tanben lei rescòntres qu’aviá previst còntra d’autreis esquipas “regionalas”.
 
Pasmens, a l’epòca, l’eveniment foguèt pas gaire représ dins lei mèdias, l’accion politica per una Corsega autonòma èra pas tan desvolopada coma uei. Es puslèu dempuei leis ans 90 qu’aquela victòria simbolica fa lo bonaür dei militants còrs. Uei la seleccion de Corsega seguís son camin, totjorn còntra d’esquipas reconegudas per la FIFA: per exemple, batèt Bulgaria en 2011 e es compausada de jogaires professionaus coneguts e reconeguts coma Giuly, Squilacci o Penneteau.