Un còp acabada la virada de 1981 deus Springboks en Navèra Zelanda, los trabucs deu rugbi e de l’Apartheid n’èran pas enqüèra acabats. Lo boicòt internacionau que’s hasèva mei insistent sus las espatlas d’Africa deu Sud e lo mitan de l’espòrt ne demorèc pas a l’endarrèr deu movement. Lavetz que l’equipa deus Springboks avèva arcuelhit peu purmèr còp un coloured (Errol Tobias), lo país se retrobèc cada còp mei isolat. L’Organizacion de las Nacions Unidas creèc un “Registre de las relacions esportivas dab Africa deu Sud” qui hasèva la lista de las personalitats qui avèva un contacte dab lo regime de Pretoria. Estar sus aquesta lista ne significava pas recéber quin castig que sia, mès èra un biaish de hicar ua premuda morau suus esportius enta’us descoratjar d’i anar participar ad ua manifestacion. En deceme de 1985, l’amassada generau de las Nacions Unidas adoptèc la convencion internacionau contra l’Apartheid dens l’espòrt.
 
La FIFA avèva, a comptar de 1963, rajat Africa deu Sud deus sons sòcis e la Federacion Internacionau d’Atletisme hascoc tot parièr en 1970. En 1974, Índia refusèc d’anar jogar la finala de la Copa Davies. En 1979, Grècia interdisoc Africa deu Sud de la Copa deu Monde de Golf.
 
Totis los qui an coneishut aqueste periòde que’s bremban shens de dobte de l’accion deu guitarista deu grop E Street Band, Steven van Zandt qui apitèc l’organizacion Artists United Against Apartheid qui avoc com règla de n’anar pas jogar a la sala d’espectacle Sun City, considerada com ua veirina deu regime raciau. Un sindicat d’actors britanics, Equity, s’i escadoc de bloquejar la venda d’emissions a la television sudafricana.
 
Ei dens aqueste contèxte tibat que, en 1985, la New Zealand Rugby FootballUnion anulèc la virada deus All Blacks au país deus Springboks. La rason evocada estoc qu’aquò èra contrari a la règla de basa qui disèva “qu’aqueste federacion avèva com ròtle e obligacion de promòver e encoratjar la practica deu rugbi”. Ei evident qu’ua tau virada ne balhava pas ad aqueste moment, un imatge deus bons de la veishiga ovau.
 
Mès s’anère lavetz debanar un eveniment complètament intatendut. Dab mejans privats (e hèra moneda, solide) ua equipa non pas oficiau de Navèra Zelanda, aperada Cavaliers, debarquèc un bèth jorn d’abriu de 1986 entà efectuar ua virada “pirata”. Entà comprénguer de plan los enjòcs de l’ahar, cau saber qu’èram a ua sola annada de la purmèra Copa deu Monde organizada l’an qui seguiscoc per Navèra Zelanda era medisha.
 
Aquesta susprenenta hasanhada èra compausada de 28 deus 30 jogadors qui èran estats seleccionats un an abans entà la virada oficiau. N’i avoc pas sonque dus, David Kirk e John Kirwan, qui refusèn de júnher los Cavalèrs.
 
Vestits de blau escur dab còth jaune, los faus All Blacks portavan un estranh simbèu suu piech: ua mena de letra “O” aplatida aus soms dab, a l’endehens un ovau verd a la huelha de heuç blanca e a l’antilòp jaune. Mès, mei qu’aquò, lavetz que lo rugbi èra enqüèra un espòrt amator, los camisòts portavan la mèrca de l’esponsor. Los jogadors e los lors adversaris estón, segon çò qui’s digoc a l’epòca, generosament retribuits. La premsa de l’epòca estoc unanima de condemnar la virada. L’International Rugby Football Board clamèc la soa desaprobacion.
 
Deus quate tèsts pervist, los Cavalèrs ne ganhèn pas sonque un e d’un sol punt (22-21) mès emportèn sèt deus ueit autes encontres contra equipas de províncias. Aquesta virada durèc deu 23 d’abriu au 31 de mai.
 
Au retorn au país, la sancions estón meilèu leugèras o moraus: refús deu Purmèr Ministre David Lange d’anar a l’estadi e dus encontres de suspension entaus jogador qui prengón part a la virada vergonhosa. La resulta estoc l’apitada d’ua navèra equipa nacionau, lèu enchafrada the Baby Blacks. Totun, au moment de la Copa deu Monde de 1987 e sustot de la finala ganhada contra França, mei de la mieitat de l’equipa èra compausada de Cavalèrs.
 
La morala d’aquesta istòria, com se ditz, ei que los tristes Cavalèrs aurén podut aténguer los cinq ans qui demoravan de l’Apartheid abans de s’engatjar dens ua benalèja qui ne hascoc pas la lora glòria mès bon, benlèu qu’ei aisit de jutjar ua decennias mei tard. Ei l’istòria qui jutjarà.