La filha del rei espanhòl es sauvada in extremis d’un judici de corrupcion que tòca a ela, a son marit, e a un complèxe malhum de politicians, entrepreneires e mafioses de tota mena. Quicòm d’abitual en Espanha, ont un simple Conselh de Ministres pòt indultar los bancaris condemnants per un jutge, per causa de delictes de corrupcion e d’autras marridas praxis.
 
Los islandeses vòtan lo partit que fa cinc annadas los butèt de cap a la grèu crisi financièra e sociala que patiguèron. E ara aqueste partit, a prepaus, s’opausa a l’intrada d’Islàndia dins l’Union Europèa.
 
En Portugal lo govèrn anóncia de retardar la retirada als 66 ans e de daissar per carrièra 30 000 emplegats del sector public. La tròica merkeliana viatja fins a Lisbona per verificar que las mesuras son sufisentas.
 
Dins lo Reialme Unit e Grècia los partits d’ideologia nazi e d’extrema dreita creisson e ocupan ja de plaças mai que remarcablas per çò qu’es de la correlacion de fòrças parlamentàrias. Fa qualques jorns lo partit conservator de David Cameron a patit un important recul electoral e, pasmens, los d’extrema dreita pujan. En Atenas lo partit nazi balha de mangiscla sonque als grècs, e un dels sieus deputats ensaja d’agressar lo cònsol. Ah, o oblidavi: lo deputat anava per carrièra amb un pistolet.
 
En Itàlia las fòrças de l’stablishment politic e financièr impausan un govèrn tecnificat (sic) per, presumptament, sortir de la crisi.
 
Soïssa decidís de començar d’estancar los permises de residéncia e de trabalh als ciutadans de l’Union Europèa temporalament. Eles parlan de los limitar.
 
E... alavetz, digatz-me, qual vòl contunhar d’èsser europèu encara? Sèm plan coratgoses, amics, mas quand quitament la paciéncia es impacienta, i a quicòm que truca. Adiu Euròpa..?