Diluns 12 dau mes de mai, una vintena de militants de l’agricultura païsana eran amassats davant l’Assemblada Nacionala a París. Partits de Sarlat (Peiregòrd) e dau Borg dau Peatge (Daufinat) marcheren quatre jorns per defendre las practicas de l’agroecologia mai que mai de çò dau suenh a la plantas.
 
D’efiech las preparacions naturalas (purent, vinagre blanc, tisana, ...) utilizadas tradicionalament e aura en agricultura biologica son illegalas. Per las autoritats, nonmas los produchs fitosanitaris de sintesi, eissuts de l’industria chimica, garentissen la securitat sanitària. Los agricultors que los utilizen pas, pòden èsser atacats en justícia, condamnats a de las esmandas importantas e lor produccion destrusida.
 
Per aver quela garentida, quilhs produchs naturaus,’pelats PNPP (preparacions naturalas pas preocupantas), deurián passat per una autorizacion de mesa sus lo merchat, que costa fòrça. Per los defensors de las PNPP, faudriá una lista especifica enb una procedura simplifiada. Qu’es çò que son venguts demandat aus deputats que examinaràn d’acianta a la fin de junh, en segonda lectura, lo projecte de lei d’avenir per l’agricultura, l’alimentacion e la forest.
 
Quel afar nos mòstrar l’absurditat duna burocracia que per protegir l’agricultura e lo consumidor vai preferir un produch toxic a un produch comestible. Los de meschanta fe dirián benleu que lo pretzfach de quela burocracia es pas tant de protegir los ciutadans coma los interests daus grops industriaus beus.