Quatre revistas paregudas recentament ( Le Point, L’Express, Objectifnews, Toulouse Mag) pausan mai o mens netament la dificultat per Tolosa a se defi nir coma capitala. Valorizan aquò  rai,  l’innovacion aeronautica e tecnologica: ”L’innovation, valeur ajoutée de demain”, segon J.L Moudenc (Le Point, 15/05/14), mas ont es l’innovacion culturala per acompanhar e empurar lo desvolopament economic?
 
Tolosa sembla pas d’aver encara capit qu’es frontalièra: “la proximité, hélas, quelque peu étrangère à la culture française, elle n’en est pas moins indispensable” se planh Martin Malvy dins la meteissa revista.  Seriám “Freinés par la barrière naturelle des Pyrénées”. Mas de qu’es aquela referéncia a la natura, mentre que sem embarrats primièr dins una frontièra mentala: ont son los tunèls reclamats per los nòstres vesins e cossí se fa que los Alps son pas percebuts coma una frontièra absoluda. Objectifnews (N° 33) parla de “frilosité”. 
 
Toulouse Mag, revista alencòp aparisenquida e provinciala, titola “Toulouse So touristic”. Son a deplorar que Tolosa capite pas de gardar sos toristas mai d’una nuèit. Mancariá, çò dison, un eveniment federatiu. Los eveniments festius actuals (Marathon des Mots, Rio Loco, eca…) semblarián  pas sufisents: ”A quand un festival de quelque chose à Toulouse, grand public et de grande ampleur” çò espera la redactora, Joëlle Porcher. Tolosa, metropòli coneguda a l’internacional deu trapar sa plaça, çò pensa lo President del Comitat regional del torisme.
 
Cal doncas imaginar quicòm. Le Point (15/4/14)en titolar: “Ce que Paris nous envie”, fin finala nos remanda al repapiatge costumièr sul mòde costumièr que lo mond entièr envejariá tot çò que ven de França. Objectifnews titola per çò d’el “Toulouse l’européenne”: una Tolosa cosmopolita e inventiva qu’a sabut comptar sus Euròpa. L’innovacion bessonada al desvolopament duradís, aquí lo còr de l’estrategia avenidoira. L’Express (21/05/14) i amb son ”Toulouse, l’ambition européenne” met en relèu las flaquesas del mitan economic tolosenc, Una escomesa per la novèla còla municipala fàcia a una diversificacion economica insufisenta.
 
E la diversificacion culturala? “Il faut imposer Toulouse comme la métropole de toutes les cultures”, çò afortís Moudenc (L’Express). Aquí l’esperam. La cultura occitana ten la capacitat d’assegurar l’originalitat de la ciutat. La tièra dels ambaissadors culturals e linguistics occitans demòra pron pertocanta, dels Trobadors fins a Deodat de Severac. Oc-ben, dormissèm sus un tesaur. Se la cooperacion amb Barcelona pena a se concretizar, ven per bèla part de la manca de promocion de l’occitan e d’una manca d’ambicion . E praquò dempuèi ongan, sem a tres oras de tren de la capitala catalana!
 
Se parla sovent de desenclavar (paraula mèstra dels economistas parisencs o aparisenquits)  las nòstras regions e Tolosa: la situacion geoestrategica de Tolosa, ça que la, es excepcionala, alencòp pòrta dels Pirenèus e de las Doas Mars. Quina autra ciutat i podriá far rampèl?