Dempuei la debuta dau mes d’octòbre, lo projecte de lei de transicion energetica per la creissença verda es debatut a l’assemblada nacionala. Au mes d’aust, vos aviá parlar dau projecte de societat que portariá quela lei e mas objeccions, mos dobtes sus la compreesion de l’enjuec ecologic que devem faciar. Pertant, finissiá sus una nòta quasi positiva: los objectius concrets nos podián benleu menar sus la dralha d’una societat de la sobrietat.
 
Veiquí los objectius chifrats que Ségolène Royal vòu atenher mercés a sa lei:
  Daus objectius clars e que me sembla a la vetz ambiciós mas sus un periòde de temps pro long per que puescham pensar qu’i ribarem. La reduccion d’emission de gas a efiech de serra serà mauaisada quand sabem que fai mas aumentar. Es liada a la reduccion de la consomacion d’energia fossila que l’objectiu es tanben ambiciós quand coneissem las volontats de desvelopar lo gas d’eschiste. Per çò de l’intensitat energetica, pense que quò necessita una explicacion: s’agís de la consomacion energetica per punt de PIB. La quantitat d’energia utilizada per unitat de richessa produsida.
 
De segur, nos faudrà veire lo contengut de la lei per saubre si quilhs objectius porràn èsser realizats. Lo trabalh parlamentari serà essenciau. Malaürosament, comença fòrça mau. Los deputats UMP, dins un grand esperit democratic, se son lançats dins l’obstruccion de l’estudi dau texte. La guerrilha daus esmendaments es lançada. Quò  monstra lor interest per los ciutadans, l’ecologia e l’avenir de la planeta.