O cal plan dire, los comentators dels articles del Jornalet an, de còps que i a, una analisi puslèu bona e fina del foncionament e de las idèas portadas per la FELCO.
 
Es doncas lo moment per nosautres de faire nòstre coming out, coma se ditz en gascon medieval, e d’o avoar: a la FELCO, sèm completament embarrats dins lo modèl francimand.
 
La pròva, tot lo mond l’a jol nas dempuèi d’annadas: coma França, la FELCO vielhís e s’es pres lo “papy boom” (o “rebombiment papetièr” en bon occitan de la teleranha) en plen dins lo morre. Breu, sèm vièlhs. Enfin… son vièlhs, los vièlhs de la FELCO qu’espèran la retirada e qu’ai profiechat de lor sièsta / penequet / prangièra del tantòst per lor raubar las claus de la rubrica que ten l’associacion dins lo Jornalet.
 
Una tactica ja utilizada la setmana passada a l’assemblada generala annadièra que se tenguèt lo dissabte 13 de decembre.
 
Après lo rapòrt moral del president Felip Martel que s’acabèt sus de paraulas pertocantas ont disiá son desir pregond, après d’annadas al servici de l’ensenhament de la lenga e de la civilizacion occitanas, de rejónher un mond melhor (evitam pas, tanpauc, los subjèctes de societat fòra ensenhament), e après lo rapòrt financièr fach per nòstras comissaris als comptes venguts tot exprès dempuèi nòstra seccion del CREO Zurich, arribèt lo moment de l’eleccion del burèu.
 
Aprofiechant doncas de la sièsta / del penequet / de la prangièra dels sòcis mai eminents de la FELCO après un repais ont la fogassa lo disputava al fromatge de Cantal e al vin novèl de Galhac (una arma que valguèt a Iraq d’èsser envasit solament per èsser estat sopçonat de n’aver amagat qualques barricas), la jove generacion – o puslèu la mens vièlha generacion – dintrèt en massa dins lo burèu.
 
Vici-president, co-secretari, clavaire e autres sòcis eissuts de totes los nivèls d’ensenhament e de quasi totas las acadèmias venon doncas renforçar lo burèu abans un putsch definitiu que sembla previst per las annadas venentas.
 
E doncas, mai seriosament per acabar, lo burèu nòu es lo seguent:
   
Membres del burèu alargat: Olivièr Pasquetti e Jeremia Marçais per l’APLR, Matieu Poitavin per l’AELOC, Olivièr Lamarca pel CREO Miègjorn-Pirenèus, Glaudina Paul pel CREO Lengadòc.
 
E lo compte-rendut complet… e oficial… es en linha aquí.