Es una còca levada tipica de la Marcha, en Lemosin. Dins aquela region, al limit nòrd d’Occitània, an la costuma de cosinar amb de burre, sustot per çò qu’es dels pastisses e de la pastissariá en general, que i es omnipresenta. Aital doncas, la picanchanha se prepara amb de farina, burre, uòus, sucre, lach e levadura. Ça que la, un còp facha la pasta, òm i apond de peras atalhonadas (o de pomas, o codonhs), que van perfumar la tarta e li porgiràn sa sabor caracteristica. I a la costuma de ne far tota l’annada, dins los ostals particulars e los restaurants. Las podèm tanben trobar sus qualque taulièr de mercat e dins las pastissariás, qu’aquelas, de còps, la fan de pasta fulhetada. Direm tanben, de nòstre costat, qu’avèm pas trobat lo mot picanchanha dins cap de diccionari occitan e que podèm pas res afortir sus  son etimologia. En d’autres endreches li dison picant.
 
 
Picanchanha
 
Ingredients: 500 gramas de farina de fòrça, 500 gramas de peras, 3 uòus, 100 gramas de burre, 20 gramas de levadura, de lach, de sucre e de sal.
 
Preparacion: d’en primièr dissolverem la levadura en un quatren de veire de lach tebesa e, après, liquidificarem lo burre a fuòc fòrça doç. Metrem la farina sul marbre de la cosina, ne farem un clòt al mièg e i apondrem lo lach, lo burre, dos uòus, cent gramas de sucre e un pecic de sal e o barrejarem e o pastarem fins qu’aquò nos faga una pasta coma la del pan. Nos la cal pastar e pautrir coma s’èra un pan; se cal, i apondrem un pauc mai d’aiga o de farina. Ne farem una bòla e la daissarem s’amolir en un luòc tebés, cobèrta amb una tòrca. Mentretant, pelarem las peras e las atalhonarem (las farem en uèch tròces, o en lescas). Al cap d’un parelh d’oras, estirarem la pasta amb un bestortièr, i metrem las peras dessús, puèi las cobrirem amb la pasta e ne farem una sòrta de botifarra espessa. Puèi li balharem una forma de corona, la metrem sus un placa de forn (oliada o enfarinada) e la tornarem daissar s’amolir, cobèrta amb una tòrca. Al cap d’un autre parelh d’oras, la pintrarem amb d’uòu batut e l’enfornarem, a 200 °C. Al cap d’aperaquí trenta o trenta cinc minutas, la trairem e la daissarem refregir.
 
Variantas: la podèm far amb de pomas o de codonhs. Podèm macerar prèviament la frucha dins de vin ensucrat. D'unes fan la corona e i encastan alavetz las peras, entièras e amb lo pecol ennaut. D’autres li donan un forma de rigòt. Los pastissièrs, modèrnament, ne fan de pasta fulhetada.
 
Lo picant a forma de còca e, de còps, se prepara amb de pasta de pan.
 
Autras denominacions: picant.