I a los que son d’a fons per el e que veson en el la Bíblia novèla;
 
I a los que son d’a fons contra.
 
I a los que son mai Canard Enchaîné;
 
I a los que pensan qu’aqueste a fach son temps;
 
I a los anticalotins, manjasotana d’un còp èra, que se congostan cada semana;
 
I a los crestians integristas que l’asiran e lo volrián veire cramar en infèrn;
 
I a los que se cresen blanc de blanc qu’aplaudisson a cada còp qu’un morre maurèl se pren quicòm dins las dents;
 
I a los morres maurèls que cridan al racisme;
 
I a los que pensan qu’un jornalista responsable deuriá soscar dos còps avant de publicar quicòm;
 
I a los autres.
 
Ne poiriái escriure un libre s’èri pro aluserpit. Pel moment, es una unanimitat unanima de l’esquèrra extrèma a la drecha extrèma mas qualques jornalistas escrivon ja que un partit o un autre seriá “en emboscada”. Tanlèu qu’un o l’autre de nòstres mossurs o dònas pensarà ne poder tirar profièch, l’union sacrada serà denonciada coma una trapèla mesa en plaça pel govèrn o per qualqu’un mai.
 
L’emocion franca de tot lo microcòsme que nos govèrnan e fan l’opinion, i vòli creire mas, e pensi que m’engani pas, quand d’arlèris botèron lo fuòc a Charlie Hebdo, cresi ben d’aver entendut los meteisses dire que lo que semenava lo vent corriá la risca de recoltar la tempèsta e que caliá èsser responsable (veire mai naut).
 
Se n’anariá temps pels uns e pels autres de prene pas pus una postura mas d’agir, per un còp —en pensant a çò que vòlon: la grandor de França, la Republica generosa o la man de ma sòrre!— per nòstra libertat, la libertat de nòstres dròlles e de trabalhar a promòure una causa completament doblidada dins nòstra societat: la fraternitat!
 
Lo coratge politic, la responsabilitat jornalistica, aquò’s pas de flatar lo monde e de far de promessas mas si ben de mostrar l’exemple e de s’amagar pas mas de se tenir “davant las tropas” per morir drech al combat se o cal.
 
L’ironia o vòl que los de Charlie Hebdo que son estats assassinats respectavan pas res e se trufavan de tot, e que, d’un bòrd a l’autre del planeta, son e demoraràn d’eròis de la libertat que presavan.