Eth passat dia 21 de gèr deth 2015 eth Parlament de Catalonha aprovèc era naua Lei de Regim Especiau d’Aran. Entà qu’ajatz ua vision ampla de çò que represente aguesta naua lei entà toti es ciutadans d’Aran la metem ara vòsta disposicion.
 

Tanben vos auançam qu’eth pròplèu dia 13 d’hereuèr eth Molt Auble. President dera Generalitat, Artur Mas, signarà en Aran era orden de publicacion d’aguesta lei en Diari Oficiau dera Generalitat que londeman dera sua publicacion dejà serà vigenta a toti es efèctes. A compdar d’aquest moment, dispausaratz tanben dera sua version en aranés.

Des deth Govèrn d’Aran arregraïm eth trabalh hèt pera ponéncia redactora d’aguesta lei, hèm extensiu aguest arregraïment a toti es grops politics deth Parlament e, a nivèu de país, eth nòste reconeishement e felicitat compartida damb toti es partits politics d’Aran que i auem estat implicadi des deth sòn inici en an 1998 e ua mencion especiau ath Deputat aranés en Parlament de Catalonha, Álex Moga, que coma relator d’aguesta lei a agut era capacitat de canalizar eth trabalh dera ponéncia redactora entà hèr possible aguesta naua lei.

Fòrça felicitats ath pòble aranés.



 

---

Aquesta informacion del sindic d'Aran se publiquèt lo 4 de febrièr sul sit del Conselh General d'Aran, la redaccion a demandat al Sindic de la publicar tanben dins sa tribuna de Jornalet.