Es plat del País Niçard. La rabalha es un nonat, qu’aital nommam los peisses que son fòrça pichons; fa pas los cinc centimètres de longor, es translucid, e de pertot i a la costuma de ne far de moletas plan gostosas. Los niçards, que dempuèi totjorn n’an pescadas, las fan tanben en ensalada. Las meton un brieu a bolhir dins un bolhon de legums e d’èrbas nolentas e en acabant las adòban amb una vinagreta e d’èrbas frescas. Semblariá, totun, que a cada còp se’n pesquèsse mens. D’unes la fan tanben amb de potinas, que son d’alevins de sarda fòrça pichons, d’aperaquí dos o tres centimètres, mas aquò es mai rar.
 
 
Salada de nonats
 
Ingredients (per 4 racions): 800 g de rabalha, 2 cebas, d’alhs, laurièr, frigola, majorana, pebre, vinagre, òli d’oliva e sal.
 
Preparacion: pelarem las cebas e las coparem per la mitat. Las botarem dins una caçairòla, las cobrirem amb d’aiga abondosa e las daissarem sul fuòc. I apondrem tres o quatre grans d’alh, un parelh de fuèlhas de laurièr, qualques brins de frigola e de fuèlhas de majorana e. Lo bolh pres, baissarem la flama e daissarem bolhir a fuòc doç. Al cap de ¼ d’ora, metrem las rabalhas dins un colador (gròs) per puèi metre lo colador dins la caçairòla, en tot ensajar de tombar pas las rabalhas en defòra del colador. Remenarem doçament amb un culhièr de fusta per çò que devon còire d’un biais unifòrme e, un còp pres tornar-mai lo bolh, trairem lo colador e las daissarem refregir. Las servirem dins un plat e las adobarem amb d’òli, de vinagre e de sal.
 
Variantas: podèm cambiar lo vinagre contra de chuc de citron. I podèm balhar una esposcada de pebre. D’unes aiman de garnir per dessús amb un chapladís d’èrbas nolentas frescas: jolverd, cebolat, estragon, cerfuèlh. Podèm metre dins la caçairòla de rametas de jolverd.