Questa setmana un subjecte que tot lo monde pensava reglat ven de tornar surtir dins l’actualitat: lo gas de sistre. Un rapòrt escondut au fond d’una tireta que se retròba difusat dins los medias. Un rapòrt comandat per Arnaud Montenourg en 2012 quand era ministre dau redreçament productiu. Un rapòrt que nos vau provar qu’es possible d’extraire lo gas e petròli de sistre d’un biais mens polluant. Mas quala es quela tecnica miraculosa que porriá remplaçar la famosa e desastrosa fracturacion idrolica – fracking per los intimes?
 
S’agís totjorn d’una fracturacion, mas sens aiga, perque la fracturacion es necessaria per liberar los gas contenguts dins la ròcha. La chausida se pòt far sus lo fluide (CO₂, giau de propan, eli chaud, … ) o en utilizar un arc electric.  Aicí, parlam d’un derivat fluorat dau propan, l’eptafluoropropan, o propan non inflamable (NFP en anglés) que redusís los riscs immediats. Queu gas pausa tot-parier dos problemas. Lo primier es que lo NFP es onerós. Sa rentabilitat, segon lo rapòrt, necessitariá que son còst siá compensat per los ganhs de productivitat e los estauvis sus los additius que s’utilizan dins l’aiga e sus lo transpòrt. Lo segond es que lo NPF es un poderós gas a efiech de serra: son  potenciau de reschaufament climatic es 3000 còps lo dau CO₂.  La solucion presentada per queu rapòrt es finalament pas tant interessanta que quò. Sens parlar de l’estimacion de las reservas en gas de sistre, que porrián èsser fòrça mens importanta que previst.
 
Voudriá soslinhar un autre aspecte de quel afar. Que nos permetrà l’extraccion de gas de sistre? Contunhar lo foncionament actuau de nòstra economia, basada sus las energias fossilas. E mai, sem prest a botar de l’argent dedins, de far de las recerchas tan sus las tecnicas coma sus las ressorsas. E, entau, contunhar a alimentar lo reschaufament climatic. Coma ecologista, me vòle batre contra los dangiers immediats aus quaus nos expausa quela extraccion, mas tanben, contra los dangiers induchs per lo sistema economic e industriau. La desnuclearizacion e la descarbonizacion, qu’es a dire la fin de nòstra dependéncia aus idrocarburs de nòstra economia, son necessàrias. La recercha d’alternativa es necessària. Qu’es aicí que los governaments daus país industrializats deurián botar d’argent.