Los Gascons seràn benlèu pas contents que fagui un missant jòc de mots amb lor parlar mas aquò rai!
 
Per èsser seriós un momenton, avètz notat que lo floron francés del nuclear es mai a mand de cabussar que de signar de contractes de venda novèls…
 
Vos parlarai pas de nuclear que i coneissi res de res! Enfin pas mai que la màger part dels ciutadans que, de tota faiçon, lor an pas jamai demandat lor avís.
 
I a los per e los contra e lo sol argument balhat pel poder politic, d’esquèrra o de drecha, dempuèi un brave brieu es aqueste: un grand país coma França deu assegurar e sa defensa e son independéncia energetica… A n’aquel punt, vos cal cantar La Marseillaise!
 
Ça que la, coma vos, legissi la premsa e gaiti lo fenestron… e lo resultat es pas gloriós, gloriós!
 
Semblariá que i aguèsse pas sonque lo latin de reservat a un elèit. Arma nucleara d’en primièr a l’epòca de la guèrra freja, puèi las centralas nuclearas o las doas abarrejadas, sabi pas.
 
S’es parlat del lobby nuclear e de totes aquels engeniaires saberuts, saberutasses que, coma totjorn amb los elèits, pensan per  nosautres.
 
Vos vau pas tornar cantar la sansònha, mas es bon de rapelar a qualques uns que la centrala de Three Miles’ Island que petèt en los Estats units nos concernissiá pas qu’èra de l’autre bòrd de la Mar grana, coma dison los Gascons.
 
La centrala que petèt en Ucraïna, qu’èra part de la defunta Union sovietica a l’epòca, faguèt qualques degalhs sus plaça mas lo nuatge radioactiu, es plan conegut, aguèt la polidesa de s’arrestar a la frontièra. Se  compren, podiá pas mostrar sos papièrs qu’avián brutlat dins l’incendi. E foguèsse estat uèi, aurián de segur considerat las retombadas en Provença e enlòc mai coma de terroristas dangieroses…
 
E puèi sèm contents d’aver l’electricat a res non còsta, non? Que los romegaires se calen!
 
Alara, perqué a Areva, res va pas pus? Los decideires, secret obliga, son pas responsables de res e, fins ara, avèm pas ausit parlar de qualque suicidat en causa del remòrs.
 
L’energia nucleara a gratís èra pas qu’un pantais? Que non pas, mas comprendretz, brave monde, que cal entretenir las centrals vielhanchonas e ne bastir d’autres e pagar los accionaris – l’Estat i es majoritari a 87 %, pareis.
 
E puèi, i a la crisi…
 
E, puèi, i a que podèm pas tornar enrèr…
 
E puèi…
 
E…
 
Aquel monde coneisson pas que lo “progrès” que o deu resòlver tot.
 
Deman, Areva, recapitalizada e EDF, accionari novèl contunharàn fins al… campairòl ultim e serem sauvats per l’eternitat.
 
Un còp èra, apreniam a las escòlas que “l’Òme [èra] un lop per l’Òme”. Deman, aprendràn, los nòstres dròlles, que… Aprendràn pas res se se daissan lobotomizar coma nos sèm laissats lobotomizar, nosautres…
 
Lo poder politic a dubèrt la pòrta e las fenèstras al Pandòra economic que pensa pas qu’al profièch e qu’a besonh pas que d’esclaus o melhor, de zombis!
 
Encara un esfòrç…
 
Dieu, que la catastròfa es polida!