Vesi pas perque los mèdia vòlon tot metre sus la plaça publica.
 
Compreni pas que los Franceses sián geloses de nòstres elèits.
 
La lista seriá longa de çò que compreni pas; deu èsser per çò qu’ai pas fach l’ENA o perque mos parents m’an pas educat coma caliá o perque la man de ma sòr èra…
 
Per astre per vos, ai pas de sòrre si que non lo cap redactor m’auriá censurat!
 
I a qualque temps, l’èx, ara vengut lo líder de The Republicans– trobatz pas qu’es melhor en anglés! – faguèt un desplaçament de 190 km en avion  per çò que, diguèron los mèdia que relaiavan sos pròches, “se voliá pas far cagar en veitura”. L’UMP, “metempsicosada” en The Republicans, es clafida de deutes mas sos amics diguèron per sa defensa que, demppuèi meses, trabalhava tant e tant per tornar metre lo partit, non lo movement, sus pè qu’aviá ben lo drech de voler pas se far cagar! Après tot, èran pas qu’un pauc mai de tres mila euros!
 
En plen congrès del PS, lo Catalan vengut francés e Primièr ministre de nòstre grand país, faguèt una escorreguda a Berlin —allo, Berlin!— per un rendètz-vos important amb “mossur” Platini, un gròs de la FIFA. I a pas encara de linha TGV entre Peitieus e Berlin e foguèt forçat de prene lo Falcon de l’Estat per poder far l’anar-tornar e veire sos amics socialistas avant que se n’anèsson… En bon paire de familha, aviá fach seguir los dròlles e ne profechèron après lo rendètz-vos de trabalh per agachar lo mach dins la tribuna VIP. Coïncidéncia, pas que!
 
Foguèt macat que los Franceses e la premsa comprenguèsson pas sos sentiments e critiquèsson l’emplec d’un avion privat — lo de l’Estat.
 
Ça que la, sens admetre qu’aviá fach una conariá, diguèt qu’o tornariá pas far. El tanben trobèt de sostens per dire que los critcaires li deurián saber grat d’èsser un bon paire… quitament amb l’argent de l’Estat, valent a dire lo nòstre.
 
La femna que deguèt demissionar per que, claustrofòba de segur mas trabalhaira, deviá prene lo taxi per n’avançar dins sos dorsièrs…
 
La Dati que…
 
E parli pas de la Marine que, al Parlament europèu emplega un fum de monde pagats per Euròpa amb la volontat plan arrestada, ça dison, de la destruíser…
 
A quand un jihad pacific de las mans netas?

Ieu, o veirai pas mas benlèu los dròlles de mos dròlles… Non? Vos senti un pauc sceptics!