Un pauc mai de tres ans fa, a Barbasta Òut e Garona) David Grosclaude, membre del Partit Occitan (POC), conselhièr regional EELV (Euròpa Ecologia-los Vèrds), apelava a un recampament de tots los occitanistas politics e culturals dins una estrategia de conquista del poder local en Occitània que la primièra estapa seriá l’escalon municipal.
 
En seguida d’una tièra de reünions dins mai d’una region occitana, aquel recampament menèt a la redaccion e la difusion per signatura d’un document programatic, lo Manifèste Occitanista, la creacion d’ un movement ciutadan Bastir! e la preséncia sus de listas de totas tendéncias (levat l’ extrèma drecha) de mai de cent candidats labelizats Bastir! a las eleccions municipalas de mars de 2014.
 
Maites sòcis del Partit de la Nacion Occitana signèron lo Manifèste e d’unes quitament s’investiguèron dins Bastir! especialament dins son comitat national de pilotatge. Per las eleccions municipalas de mars de 2014, Bastir! atal labelizèt mai de cent candidats presents sus de listas de totas tendéncias (levat l’extrèma drecha); 55 d’entre eles foguèron elegits conselhièrs municipals, çò que permetè la revitalizacion de l’Associacion dels Elegits Occitans.
 
Malastrosament, l’estapa seguenta, es a dire la de las eleccions departamentalas, foguèt maganhada. Una procedura de labelizacion Bastir! foguèt organizada plan tròp tardièrament per respondre als imperatius del calendièr electoral. D’un trentenat de postulants a la labelizacion Bastir! sus l’ensems d’Occitània (dels quals gaireben la mitat dins lo sol departament del Gers), sol un pichon vintenat de candidats l’obtenguèt.
 
La rason n’es politica. Los sòcis del Partit Occitan, majoritaris al dintre del Comitat nacional de pilotatge de Bastir!, quichèron de manièra anti- democratica per que la magèr part dels candidats a la labelizacion sostenguts pel PNO o País Nòstre obtenga pas lo label Bastir! atribüit gaireben exclusivament a de candidats del POC o de EELV.
 
Lo resultat mai clar d’aquel comportament egemonic del POC es que Bastir! a pas mai de rason d’èstre.
 
Al mai, lo POC, emai d’unes de sos membres o reconeguèssen pas, sembla d’aver virat lo fuèlh Bastir ja que aquel partit organizèt doas reünions de promocion de sa novèla formula “renovada” jol nom de Endavant lo 25 d’abril, data per abans anonciada coma devent èstre la de l’ A massada Generala de Bastir!, laquala es “reportada” jol pretèxte que l’agenda es “tròp butassat a la fin d’aqueste mes d’abril”.
 
An aquelas reünions, los membres minoritaris de Bastir!, especialament los del del PNO èran pas convidats
 
Per las eleccions regionalas de decembre que ven, òm pòt preveire que lo POC s’inscriurà sens resèrva dins la movéncia de l’esquèrra francesa e en particular que s’aligarà, se o pòt, amb EELV. Vertat es que i a de pòstes en vista, a condicion çaquelà que EELV prenga pas un gautal electoral, e que lo POC pòt aver de permanents sonque gràcias als subsidis de EELV.
 
Pasmens, es pas segur que l’aliança POC-EELV siá recondusida. EELV, en la persona de Gérard Onesta, fa la guinhada als occitanistas d’esquèrra mas aqueles causiràn benlèu de s’aligar amb d’autras fòrças d’esquèrra. De tot biais, lo POC risca plan de tornar privilegiar l’aliança amb l’esquèrra francesa qu’es pas en bona postura per las eleccions venentas
 
Bastir èra la sola la sola instància de dialòg e de cooperacion entre las diferentas tendéncias dels politics e dels culturals occitanistas.
 
Lo POC, renomenat d’ara enlà Endavant, ambiciona de far venir a el tots los occitanistas e tòrna al sucursalisme.
 
Coma, d’un autre costat, la refòrma territoriala es facha, en partida, per rendre la vida malaisida als partits etnics: occitans, bascs e catalans, caldrà que lo PNO adòpte una estrategia de remplaçament.
 
Montar una lista per las regionalas dins al mens una region senon doas, compte tengut del nombre de candidats de trobar e de l’argent d’investir, necessitarà de s’adreiçar non solament a de movements coma País Nòstre, Bastir Gasconha tolosana, als occitanistas independents mas tanben a d’autras fòrças, non inscrichas dins lo partiment esquèrra-drecha, coma los ecologistas independents, los federalistas europèus, e evidentament los bascs e los catalans.
 
E mai atal, es pas segur que capitarem e se es pas lo cas, nos deurem donar los mejans d’èstre malgrat tot presents dins la campanha electorala.
 
Naturalament, lo Partit de la Nacion Occitana serà present a Montpelhièr lo 24 d’ octòbre a la novèla manifestacion per la lenga occitane que aviá soetada mas sens illusions.
 
Malgrat los empachs institucionals, pesarem sul poder central a París sonque se representam amb los autres pòbles de França una fòrça electorala fisabla.
 
Seguirem tanben amb interès, l’anament del breton, Christian Troadec, menaire dels Bonetas Rojas” per ensajar de se presentar coma candidat “regionalista” a las eleccions presidencialas de 2017 en cercant los pairinatges dels elegits de las nacions sens Estat de la Republica francesa..
 
 
 

---

Editorial del numèro 114 d ela revista Lo Lugarn