Quitament se, per natura, soi totjorn en vacanças, m’arriba de l’èsser encara mai! Frasa que vòl pas res dire, me diretz. Auriatz tòrt per çò que, quand soi mai en vacanças qu’a l’ordinari, aquò vòl dire que daissi tombar çò que me permet de m’assabentar, coma o fasètz vosautres, es a dire los mèdia.
 
Son pas las ocupacions que me mancan mas soi un addict de las novèlas, bonas o marridas, ont que se passan.
 
E, de la drecha extrèma a Grècia en passant per Platini e la FIFA, i auriá de qué se metre en colèra.
 
E encara parli pas del monde que, al nom de lor veritat, escotelan los que son pas de lor bòrd o envian de joves, òmes o femnas, se far espetar al mitan d’une fola se possible…
 
Cada jorn, la sansònha se torna jogar e cada jorn los jornalistas escupisson chaples e regaudiments d’una votz neutra e, quitament totjorn, passan dels uns als autres sens prene la pena de marcar una pausa.
 
Los mai intelligents —o mai conscients— an l’audàcia d’apondre entre las doas novèlas: “E ara, sens transicion…”
 
Sens transicion, ieu tanben… La setmana passada, se debanèt l’Estivada de Rodés e legiguèri dins la premsa locala que lo director, Patric Roux, passava la man en disent que après sèt o uèit ans aviá fach son temps e que caliá un òme —o una femna— nòu.
 
De passar la man es normal après qualques annadas mas aquela decision interven a un moment que de rumors nombrosas circulan a prepaus de l’Estivada.
 
E quitament ieu, que soi pas al fial del cossí del perqué, n’entendèri —de las rumors?— dichas per de personas qu’an pas res a veire amb l’Estivada o alara unicament perqué an un comèrci pròche del plan dels Rutèns.
 
Rumors, mièjas vertats o vertats: D’Estivada, n’i auriá pas pus a Rodés o alara dins un autre endrech en vila o mai segurament tornariá a Borran… Es pas sa plaça a costat del musèu Soulages… Los mercadièrs, pròche del luòc de l’Estivada n’an lor confle per çò que pòdon pas trabalhar en causa de la carrièras que son totas barradas; e, de tota faiçon, son los “restaurants” de l’Estivada que panan totes los clients…
 
En mai d’aquò, lo conse de Rodés es contra. Ongan la suvencion foguèt en diminucion, e oficiala sonque lo mes de març o d’abrial —tres meses avant la data de la manifestacion—, me diguèt “en persona personalament” lo futur èx-director.
 
Desempuèi qu’existís, l’Estivada a pas jamai agut lo resson que s’amerita dins la premsa exagonala mentre qu’es La manifestacion que fa s’afichar amassa las diferentas regions occitanas.
 
Mas capitèm pas de far comprene a nòstres elegits d’agachar un pauc mens París e un pauc mai lo país immediat.
 
Vaquí perque mas “vacanças” son estadas pièger qu’a l’ordinari…