I a de setmanas aital ont calriá reagir a mai d’un evenimet per jorn e me cal saludar los esfòrces de Jornalet.com qu’ensaja d’o far amb los mejans modèstes que son los sieus… E anetz pas creire qu’es de maneflariá, es sonque un constat…
 
Francisco (l’Argentin de Roma), Barack, Vladimir, Jinping, François (lo de París), per parlar pas que d’eles se son rescontrats, crosats o seguits a Washington e a Nòva York al sèti de “la causa” – lo “machin” de De Gaulle!
 
Qu’aquò nos agrade o pas, lo papa jòga pas la meteissa particion. A, d’en primièr, a téner son ròtle de líder dels Catolics e, dins aquel domeni, las reaccions pòdon èsser fòrça violentas… Mas, es benlèu lo primièr còp, dins l’epòca modèrna, qu’un papa a decidit de far bolegar mai que las linhas. Ausiguèrem, de mon punt de vista, un discors novèl e refrescant amb de mots simples e non pas las circonlocucions costumièras als caps d’estat o a lors representants dins aquela assemblada.
 
O sabi que n’i aurà per dire qu’el tanben presicava per sa parròquia mas una parròquia aital soi segur qu’auriá un fum de partisans. De segur, a pas cap de “divisions”, coma o disiá Stalin, mas, après tot Joan Pau II capitèt ben dins sa lucha contra l’empèri comunista, alara perque Francés obtendriá pas cap de resultats contra, en un mot, la “finança”?
 
Los autres susnomats joguèron a mai-democrata-que-ieu n’i a pas! Amb d’arguments convencèires, o cal dire.
 
Òm pòt pas reprochar a Barack e a François de París d’aver dich que, en Siria, “las victimas e lo borrèl” podián pas trabalhar amassa après tantes chaples de la part del borrèl.
 
Òm pòt pas reprochar a Vladimir d’aver rebecat qu’èra pas als estrangièrs a decidir de l’avenidor d’un cap d’estat legitimament elegit!
 
De totas faiçons, los mòrts tornaràn pas votar e los extremistas dins cada camp fan parlar las bals e non pas las urnas…
 
En cò nòstre tanben, se parlèt de democracia e de dialòg social. Lo Catalan de París a considerat que mens del cinquanta del cent èra una aprobacion e, en consequéncia, decidiguèt d’aplicar çò qu’aviá decidit d’aplicar!
 
Lo jorn d’abans, aviá, el e François de París, anonciat que, contra l’avís de totes las comissions constituidas per aquò, las linhas Bordèu-Dax e Bordèu-Tolosa se farián per çò que l’avenidor de nòstre grand país ne dependiá…
 
I a de setmanas aital que sèm ufanoses d’èsser ciutadan del país que “creèt” la democracia…