Se parla fòrça d’Air France per aquesta passa. Las informacions circulan, sovent incompletas e dens un gran pacho-macho on priman, com de costuma, lo sensacionalisme e l’anecdòta. End’aver una vision mès clara, vos perpausi informacions qu’atz pas forçadament, e que’vs balharan benlèu una idèa mès precisa.
 
Aquestas informacions son estadas causidas solide d’un biais subjectiu, mes ensajan de hèr lo balanç dambe las eventualas mancas deus mèdias màgers.
 
La direccion avèva perpausat en octobre aus sindicats de pilòts un plan d’aumentacion de la productivitat (20%), basat sus un creish de la oras de trabalh, çò que semblava pas extraordinari dens una situacion mauaisida. Ende’us convéncer, la direccion avèva botat sus la taula uns 2.900 licenciaments sus l’ensems deus emplegats, çò qu’es, per contra, mès curiós.
 
Cau saber qu’un plan de ganh de productivitat, aperat Transform 2015, èra dejà estat aplicat, dambe una resulta de 100% d’esfòrces deu personau au sòl, 96% ende las ostessas e los òstes, e 67% per çò qu’es deus pilòts. Tot aquò acompanhat d’un blocatge deus salaris en 4 ans. Lo plan suplementari es doncas apareishut coma una engana.
 
Entre 9.000 e 10.000 pòsts an dejà estats suprimits dempuèi 2014, epòca quan lo PDG hèr créisher son salari de … 74%.
 
Las companhias a baishas còstas son subvencionadas per las collectivitats localas que, atau, involontàriament, finançan lo dumping sociau.
 
Las companhias a baishas còstas “ganhan parts de mercat”, mes lo sector deu carrei aerian es en creish. Lo prètz de carburant es pas jamès estat tan baish. Air France coneish una empleada de 88%, çò qu’es generalament plan milhor que non pas aquestas companhias (egalitat dambe Easy Jet). Per exemple, Lufthansa n’es a 81%.
 
Remèrca subjectiva de l’autor: la situacion d’Air França es pas tan marrida qu’aquò, a maugrat de l’estonanta virada deus mèdias hèita, una annadas hè, peu PDG de l’epòca, Jean-Cyril Spinetta, qu’estoc après, tornat elegit peus accionaris en despieit de las marridas resultas suspausadas. La companhia lavetz acabava de crompar uns aparelhs navèths e èra en creishença. Aquesta virada mediatica semblava una campanha de pression de cap aus emplegats ende qu’acceptèssen lo plan de restructuracion qu’arribava.
 
Remèrca objectiva: los pilòts ac sabon plan, pr’amor que son automaticament accionaris de l’entrepresa, e los cauma de l’an passat a pas “botat en dangèr” la companhia.
 
Lo patron d’Air France, Alexandre Begoügne de Juniac, un pròche de Nicolas Sarkozy, es ideologicament un extremista liberau. Vasoc famós per sas frasas ditas aus encontres patronaus de Royaumont en deceme de 2014, que tornavan botar en causa l’interdiccion deu trabalh deus dròlles e sas remèrcas suu hèit que, a Qatar Airways, los pilòt en cauma serén estats mandats en preson.
 
Remèrca de l’autor: com se pòt lavetz parlar de concurréncia, s’es una partida de butabala a 55 contra 11 qu’an los pès ligats?
 
Èi l’impression que los emplegats d’Air France son au centre d’una batèsta qu’es pas qu’una part de la guèrra grana e etèrna entre mèstes e vailets.
 
De seguir …