Ditz ua hemna en carrèr: “guarda quina mainada mès polida, guarda quin mainatge mès tracassièr. Ei fòrça esperdigalhat eth, ei fòrça presumida era. Dame un punet qu’ès beròia e as d’èster simpatica. Ei egau se non vòs, es mainades an d’èster carinhoses. Aué t’as de méter un vestit, qu’es mainades n’an de portar. Eri, que pòrten çò que volguen, que s’enlordissen molt en tot jogar. Ròsa. Blu non. Non te’n hesques se te lheuen era pelha en pati dera escòla, son causes de mainadèra, ei un jòc. Non te’n hesques se te shiren deth pèu. Es mainades granes non ploren. Es mainades granes non criden. Es mainades granes escoten e caren. Que polida qu’ès! Se te traten mau ei que t’an enveja, qu’es autes mainades son molt geloses, ei pr’amor qu’ès molt intelligenta, ei pr’amor qu’ès era mès polida, era mès sharmanta. Atau ei com cau èster. Ès plan beròia damb aguest lacet que t’a metut mair. Non sigues capriciosa. Hè eth favor de non èster tan basta en jogar. Sembles un mainatjòt tot eth dia damb eth fotbòl. Aqueri jòcs non son tà mainades. Deisha de queishar-te. Jòga damb es momes e es codinetes, es camions e es videojòcs non son tà tu. Es mainades estudien mès. Es mainades son mès educades, tostemp tant caradetes eres. D’activitat extraescolara haràs dança, era informatica e er espòrt son engüejants. Vòs que te diguen que sembles un omenòt? Dança. Haràs coreografies. Dança tà pair, se le què era bauassa. Canta-me era cançon de mòda. Reggaeton. Guarda que ben que se botge. Sembles un maniquí dera television. Qué ditz era cançon? Canta-li a papa: «Hola bebe.
Ya que contigo no
sirve la labia, y te crees muy sabia,
pero vas a caer, te lo digo mujer»”. Canten eri. Eres dansen. Pòca ròba.
 
“As nòvi? Susvelha qu’ès joena, susvelha que n’i a que voleran aprofitar. Es mainatges sonque pensen en ua causa. Es mainatges an eth cervèth entre es cames. Ja as nòvi? Comences lèu! Tostemp damb es mainatges tu. “Marimacho”. Guarda qu’ès pòc afeminada. Non hès que cahuar-les, provocar-les. Ja l’ac as minjat m’an dit. Pica tà que te venga a cercar. Atau vestida vas a gésser? Sembles ua gru. Susvelha. Que t’acompanhen es tòns amics. Se non vòs que te campen tà que vas escotada? Te pintes era cara coma ua quinsevolhe. Se non volies que te toquèssa tà que me provocaues? Non ei non? Didetz non quan volets díder òc. Es hemnes ètz complicades. Sonque èm jogant, non te metes atau. Què passe, as eth periòde? Camine atau tà meter-me caud. Danse atau tà meter-me caud. Me campe atau tà meter-me caud. Son totes egaus. Te cauhen e dempús te deishen damb es ganes. Damb qui ères? Non m’as arresponut eth whatsapp. Sabi que l’as liejut. Doble check blu. Per què non m’arrespones? Damb qui ès que non m’arrespones? N’as un aute. Toti es òmes son uns cornuts. Ès ua puta. Ven a per aquera qu’ei facila. Era amiga leja e grossa segur que te la pòs hèr. N’a de besonh. Va cauda. Le pique era tavelha. Te’n vas tath lhet damb toti, pòrca. Vaja cu que se t’a metut, atau coma vòs ligar? Envia-me ua fotografia des que ja sabes. Te vau a enregistrar en vidèo, serà tà tu e tà jo. Eth nòste secret. Se me quites ac ensenharè a toti, tà que veiguen qu’ès ua lorda. Ad aquera ja me l’è caucada. Encara non t’an desvirgat? Estreta. Lesbiana. Te vau a hèr ua hemna. Es sciéncies entada eri. Tu mèstra. Tu estetica. Se non vòs arren tà qué t’acompanhi tà casa. Dues en ua net. Mascle alfa. Dus en ua net. Puta.”
 
“Èster mair. Massa joena. Massa vielha. Se te va a passar er arròs. Te quedaràs soleta a vestir sants. Non vòs èster mair? Non seràs complèta. Te perderàs çò de mès important e polit ena vida d’ua hemna. Ès lesbiana. Es mès madures son mès faciles pr’amor que van desesperades. Vigila non les deishes embarassades, ei çò que cèrquen. Vosates òc qu’ac auetz facil, damb ensenhar ua popa tot ei apariat. Aquera a es popes queigudes, semble ua vaca leitèra. Aprima-te un shinhau que ven er estiu. Non minges tant que se te met en cu. Cara que tu non en sabes d’açò. Ad aguesta mos l’auem caucada toti. Ei ua gru. Òsca quin campion, damb dues ath madeish temps. Quan volga me la hesqui. Coma te torne a campar le foti ua mastegada. Aué gesqui e me’n pòrti ua tà casa. Eth prètz qu’an ei tres cubates. S’ei harta milhor, se deishe hèr de tot. Tant de temps en tot cercar-me e ara me vas a díder que non vòs arren damb jo? Des de qu’ei damb aquera ja non se le ve eth pèu, l’a estacat. Maridat, cagat. Tu es cortines, jo eth coche. Eth m’ajude de tant en tant en casa. S’an metut de mòda es lesbianes. Era societat les minge eth cap. Massa libertat, pòc sacrifici. Era familha non la trigues, te tòque. Ara le tòque ada era cuedar as sòns pairs. Era libertat se pague.”
 
“Qué as hèt tà dinar? Qué as hèt tà sopar? Plancha-me es camises. Eth que pòrte eth pan tà casa sò jo. Es gràcies m’auries de dar. Tu tot eth dia damb era grèra. Hastiosa. Atau d’escotada vas a gésser? Es ua hemna maridada! A on m’as amagat era cartèra. Me cambies es causes de lòc tostemp. Gesqui damb es amics. Sense jo non gesses. Sò cansat, vas a hèr eth sopar, non? Tostemp as mau de cap quan n’è ganes. Cara-te qu’è mau de cap d’entener-te. Hemnes e òmes non podem éster sonque amics. Ambiciosa. Manipuladora. Era politica ei causa d’òmes. Cau un òme tà tirar es causes endeuant. Per colhons! En parlar, eth masculin ja inclodís eth femenin, atau m’ac ensenhèren ena escòla. Vos queishatz per arren. Eri tostemp pensen en çò de madeish. Es tant sèca perquè te manque un bon povàs. Me cèrque e me trobarà. Va a veir çò qu’ei caucar aguesta. Encara non a trobat un òme coma jo en lhet. Eth te trate ben, qué mès vòs? Era carrèra non ei importanta. Eth pòrte es sòs. Ès ua isterica. Non sabes compréner ua broma. Deisha de plorar ja, òsca! Mos manipulatz damb era vòsta plorèra. Sembles ua adolescenta damb aguestes pegaries. Non me digues açò deuant des mens amics. Vas massa escotada se non i sò jo. Gesses enquià massa tard. Beues massa. Parles massa. Susvelha, era gent parle de tu. Non discutisques damb jo en public. Jo è era arrason. La violèren? Quauquarren deuie hèr. Provòquen. Se vestissen coma putes. Ac demanen a crits.”
 
“Tu sense jo non series arren. Tu sense jo non auries arren. T’estimi, petita. A moments perdi es papèrs. Te voi protegir. T’estimi, non me quites. Se me quites non sabi qué pogui hèr. Ès ua mala mair. Sò damb tu pes mainatges. Sacrifici. Mair coratge. Sò hart des tues pegaries. Se me quites hèsqui bèra bestiesa. Era egalitat ja existís. Feminazis. Auetz çò que voletz. Viuetz coma reines. Vos pelejats entre vosates. Ètz retorçudes. Era culpa ei d’era. Ara damb quinsevolhe causa t’acussen de mautracte. Era custòdia des mainatges ei tostemp entada eres. Se’n aprofiten. L’ac hèn a passar mau ath pair. Ès ua isterica. Se m’a escapat era man. Perdona. T’estimi. Ei peth tòn ben. Me tractes tant mau que me meti nerviós. A viatges non te supòrti mès. Perdona-me mil còps. T’estimi. Que non me quites, òsca, o t’aucisqui. Torna. Sense jo non ès arren. Torna o t’anarè a cercar. Se non tornes...”