Aviá previst d'escriure sus la COP 21 mas es pas chabada e l’actualitat me comanda de parlar de quauquaren mai. Un mot d’òrdre nos exòrta de ne pas far d’amalgama entre los terroristas islamistas e lo musulman mejan. Ieu, aimariá ben ne far un totparier d’amalgama. Un amalgama que fará benleu pas plaser mas que me sembla mai que necessari. L’amalgama entre los radicalizats d’extrema drecha: tant los islamistas coma los ultra-nacionalistas francés.

D’efiech nòstra societat coneis un fenomen de radicalizacion d’una partida de sa populacion a l’entorn de tematica identitària e religiosa: jihad o crosada. Coma occitanistas, coma progessistas, coma ecologistas, nos fau nos pausicionar dins lo camp daus democratas. Dins lo camp de l’amalgama de quelas doas formas de l’extrema drecha, lo camp que regeta lor violéncia, lor vision passeïsta e retrograda daus drechs de la femna, daus drechs sociaus, lor volontat de conflicte etnic e religiós au dedins de nòstra societat.

Devem reüssir a comprener e a combatre las rasons que menen a quela radicalizacion, mai que mai de nòstra jounessa, sens ren laschar de nòstre ideau democratic de respècte de la libertat religiosa - perque los musulmans e los josieus an tota legitimitat, daus drechs de la femna, daus drechs daus omosexuaus. 

Apele pas a un unitat nacionala, quala que siá la nacion en laquala vos reconeissetz, apele a l’unitat daus democratas en delai las frontieras e las oposicions ideologicas.