Vivèm un periòde deus treboses, ac sabèm, mes fin finala, e i a agut vertadèrament un periòde pas trebós dens l’istòria?
 
Los atemptats de noveme a París an acabat de’ns destimborlar e de’ns hèr pérder las mèrcas. Sabèm pas mès, a còps, çò que cau pensar de tot aquò. Çò de segur es que sèm pas acostumats ni tanpauc formats a la violéncia e que la tòca purmèra deu terrorisme es de’ns esvarjar ende’ns hèr empachar de soscar d’un biaish normau e rasonat.
 
Tot passa lèu, los eveniments s’encadenan tan viste que nòste cervèth seguís pas plan. La conferéncia suu climat, las elecions regionalas e las vacanças d’ivèrn an dejà remplaçat l’ataca deu Bataclan. La quita vida modèrna e son ritme descabestrat nos deisha pas tanpauc lo temps de soscar coma caleré. E totun, totun, nos i devèm escàder se volèm estar ciutadans responsables.
 
Una informacion, lèu desbrombada, solide, a aperat mon atencion la setmana passada. Una informacion gaireben qu’es de non pas créser, a un punt que sembla practicament irreala: en Belgica, dens lo barri popular adara plan conegut de Molenbeek (lo qu’Eric Zemmour perpausava de bombardejar), la polícia localizèc, au 47 de la carrèra Delaunoy precisament, la preséncia de Salah Abdeslam, lo terrorista subervivent deus atemptats de París. Aquò se dabanèc unas 48 oras après los eveniments que trebolèn la tèrra sancèra en tot hèr las purmèras paginas de totis los jornaus deu monde.
 
E de qué’s passèc? Ren. Pr’amor, segon Koen Geens, lo ministre bèlga de la justícia, que la polícia a pas lo dret de perquisicionar entre 21h e 5h. N’i a pas que dus cases que permeten aus policièrs d’entervénguer: la malahèita (flagrant délit) e l’incendi.
 
Doncas, segon lo ministèri bèlga, las atacas deu Bataclan son pas una malahèita e solide que, l’avocat de l’Estat Islamic avosse portat lo clam, lo govèrn deu reiaume auré sautat. Au contra, pensi jo qua l’arrestacion de l’enemic public n°1 auré balhat a tota l’administracion una glòria mondiala. E ben, non pas, lo règlament es lo règlament. Mes es pas tot.
 
En seguida d’una decision incresibla, quan las fòrças de l’òrdi entrèn dens l’immòble l’endeman de matin, lo Salah Abdeslam avèva desapareishut coma dens un filme de James Bond. Segon Europe 1, “lo ministèri public federau refusa d’indicar se lo lotjament èra estat plaçat devath susvelhança policièra pendent la nueit.” Cresètz qu’aquò es una marrida trufandisa? Es pas la fin.
 
Segon Le Monde aqueste còp, la famosa perquisicion s’es pas debanada a 5h deu matin coma poderém pensar, mes a 10h (!). L’ausèth s’èra esparvolat. Suspresa? Segon Claude Moniquet, ancian sòci de la DGSE e especialista deu terrorisme, interrogat per Europe 1, “Nat explic es valide”.
 
S’ajustam que Salah Abdeslam estoc arrestat per la polícia la nueit deus atemptats deu costat de Cambrai en companhia de sos amics que’u venèvan quèrrer, mes qu’estoc deishat liure pr’amor que las autoritats deu reiaume envièn son senhalament a las autoritats francesas “15 mn tròp tard”, podèm pensar que sèm dens una maishanta istòria bèlga.
 
Segon L’Express aqueste còp, Salah Abdeslam seré estat interceptat tres còps (!) lo 14 de noveme au moment deu son retorn a casa. Auré quitament balhat son adreça a Molenbeek au tresu conta-ròtle.
 
Coma nòste aujami èra fichat dempuèi lo mes de junh, me demandi clarament çò que’n cau pensar. Tot se debanèc coma s’èra protegit per la polícia. Mes pr’amor? Quin interés? Tot aquò sembla plan dessenat.
 
Èi pas la responsa, èi pas la solucion. Mes francament, una tala escadença m’agrada pas brica. Solide qu’i a autas questions sus aqueste ahar, mes que son mens grèvas e qu’an solide un explic.
 
Pr’amor los tres kamikazes de l’Estadi de França se hèn petar dens un lòc on son segurs de destorbar pas degun? Un, aquò pòt estar una malagida, mes tres?
 
Pr’amor los SAMU de la region parisenca èran en exercici aqueth medish dia justament sus un atemptat suspausat a l’arma automatica dens lòcs diferents de París? Sabi qu’un azard pòt arribar, mes totun, estoc tanben lo cas ende los atemptats de Londres, de Madrid e de Boston.
 
Lavetz, sabi que cau pas càder dens los complotisme e véser aquí dedins la man invisibla deus Illuminati odeu Navèth Òrdi Mondiau, mes coma lo ministre de la Polícia bèlga s’apèra Jambon, nos caleré pas tanpauc prénguer per cambajons, com se ditz.