L’espandiment de descadéncia de la nacionalitat francesa aus binacionaus nascuts en França a amiat un debat ahuecat. Com de costuma, es una question fòrça complèxa, vòli pas díser complicada, mes que compòrta mès d’un aspècte. M’agradaré de’us passar en revista.
 
 
Es una idèa de dreta
 
Aquesta decision es contestada a esquèrra. Lo president l’es anat quèrrer a la dreta de la dreta e, podèm díser, a la dreta extrèma, pr’amor que Nicolas Sarkozy e lo Front Nacionau l’avèvan dejà perpausada. Perqué una tala decision?
 
Podèm pensar que François Hollande es dejà en campanha electorala de reeleccion. Daubuns an dejà evocat la possibilitat de balhar pas aus presidents qu’un sol mandat, end’evitar justament una tala situacion que nutz, plan evidentament, a la vida politica deu país.
 
L’estrategia es simpla: i a un nombre constant de monde que votaràn de tot biaish tostemps endeu Partit Socialista o endeu candidat dit “de l’ esquèrra”. Ende hèr créisher son electorat, cau anar “pescar” votzes de l’aute costat. Es per aquò que Hollande ensaja de sedusir lo monde pas estacat a una politica mes que trantalha a cada eleccion.
 
 
Servís pas de ren
 
Totis son d’acòrd, dambe los quites que dehenen lo projècte, que l’eficacitat de la mesura es fòrça limitada. Balha lo parat aus umoristas de’s trufar en imaginar de descàder de sa nacionalitat un kamikaze escampilhat en mès d’un tròç ende’u poder tornar mandar dens son “país d’origina” (on es pas benlèu jamès estat) per la pòsta. Tot estauvi es bon ende l’economia nacionala.
 
Lavetz pr’amor aucupar l’espaci public dambe una question que servís pas de ren? La responsa es la medisha que non pas au capítou precedent.
 
 
França se pensa lo centre deu monde
 
Aqueste biaish de pensar muisha qu’una part deus Franceses es convençuda de çò qu’un terrorista “s’amerita pas” la nacionalitat exagonala. Seré aquò la vertut suprèma? Los forçaires de dròlles o los tuaires de mametas se l’ameritan benlèu?
 
Comprenguen pas qu’un binacionau nascut en França i a automaticament passat son escolaritat sancèra e que son engatjament terrorista es la mèrca d’un escac relatiu de l’Educacion Nacionala que l’a pas podut o pas sabut balhar un esper, un interés dens la vida comuna o simplament hè’n un ciutadan.
 
Cada terrorista nascut en França a passat automaticament 11 annadas a l’escòla sens d’integrar lo concèpte de respècte de la vida umana, mes a pas que subit una seleccion per las matematicas. I auré pas quicòm de tornar soscar?
 
 
Los dangèrs amagats
 
End’una bona part de la poblacion aquesta mesura sembla de bon sens. Se pensan aquò, es que vesen pas çò que’s pòt escóner a l’endarrèr de dangerós.
 
La nocion de “terrorisme” es cambiadissa. Am plan vist, au moment de l’apitada de l’estat d’urgéncia que militants ecologistas patiscón de repression injustificada sens que degun protèste pas. Ende lo regime de Vichèi, un resistent èra un terrorista e De Gaulle eth medish estoc descadut de la nacionalitat.
 
Ara, imaginèm: lo Front Nacionau arriba au poder. Es pas que de ficcion? Non. L’ambient politic se tiba còp sec. Unas decisions politicas que miaçan las libertats hèn devarar lo monde per carrèras, com aquò se passa en Polonha, per exemple. Las manifestacions viran a la castanhada, bastidas son uscladas e monde son alebats. Dajà vist.
 
Ma hilha, qu’es una joenòta de 20 ans, protèsta contra lo govèrn e es arrestada per la polícia. A la dobla nacionalitat, francesa e polonesa e vasoc a Tolosa. Pas besonh lavetz de leis d’exepcion ende’u retirar la nacionalitat e la hòrabandir deu país.
 
N’i a que dison que, se lo pair es de nacionalitat francesa, risca pas ren. Èi cercat de pertot una precision sus aquò e l’èi pas trobada. E de mès, es pas sonqu’un petit detalh de cambiar, lo trabalh màger serà dejà estat hèit per nòsta “esquèrra republicana estacada a las valors de la Republica.”
 
Mercés Francés.

---