Ende reagir a çò qu’apèla “complotisme”, lo govèrn francés a decidit de gahar l’aviada e de passar a l’accion. Perqué una tala arronçada? Mauaisit de díser, pas nat element deu calendari politic pòt explicar aquò. Benlèu un chepic de cap a un fenomène que s’espandís.
 
La setmana passada, tres accions governamentalas an muishat una volontat de lutar contra la remesa en causa de la teorias oficialas e de la propagacion de teorias alternativas:
 
Una jornada d’estudis lo 9 de heurèr au Musèu d’Istòria Naturala de París a l’iniciativa de la ministra de l’Educacion que’s sonava “Reagir fàcia a las teorias deu complòt”. Èran amassats colegians, liceans, estudiants, ensenhaires, universitaris, cercaires, sòcis d’associacions, jornalistas, psiquiatres e juristas end’escambiar lor experiéncia e partici par a taulas de discutida.
 
Un siti navèth, aperat On te manipule, “Te manipulan”, estoc inaugurat sus las paginas internèt deu govèrn.
 
Un filmòt signat Kevin Razy, un joen actor que’s produsís sus la telaranha dambe comediòtas tostemps risolièras, e que, aquí, conselha de’s mauhisar de las informacions que son carrejadas peu web.
 
De la jornada d’estudis, ne sabèm pas encara fòrça, levat lo discors d’introduccion de la ministra, mentre lo quau utilizèc l’esperit plasent ende’s trufar de las farcejadas que’s passejan e que, entre autes, la disón emprenhada o divorciada.
 
Lo siti navèth, una pagina en hèit, perpausa lo filmòt de Razy, un aute sus Guillaume Brossard, co-fondator deu siti Hoaxbuster, e un eschèma grafic: “Lo detector de teoria deu complòt” que, a partir de la frasa: “E existen pròvas irrefutablas de l’existéncia d’un complòt?”, vos gavida segon que reponètz de òc o de non, capvath possibilitats de totas, de: “Mauhisatz-vos, poderètz estar en fàcia d’una teoria deu complòt”, dinc a: “L’ipotèsi d’un complòt pòt pas rasonablament estar escartada. Reportatz-vos aus tribalhs de jornalistas o de scientifics end’apregondir la question.”
 
Bona idèia, que la complicitat entre los jornalistas e lo poder es tostemps a la basa de çò qu’apèran lo “complotisme”. Sèm plan avançats.
 
Perqué disi que lo govèrn s’enmescla?
   
I a quicòm que lo govèrn e totis los que volon “lutar contra lo complotisme” an pas comprés. Aquesta campanha vòu pas sonque hèr passar un sol messatge: “mauhidatz-vos de las fonts d’informacions” e s’acontenta d’aquò. Pòt pas brica convéncer los que son amirats. Lo problèma es pas la font d’informacion.
 
Sovent, e gaireben tostemps, las teorias ditas complotistas son bastidas justament a partir de documents oficiaus, vidèos de jornau televizat d’Estat, extrèits d’emission, o causas atau. Los “complotistas” botan puèi lo dit sus detalhs estranhs que hèn pensar que l’eveniment s’es pas passat com ac ditz la version oficiala.
 
Doncas, se lo comentari es: “Espiatz a de bon, lo fesilh tira dambe faussas balas, la veirina es pas copada”, es plan van de respóner: “Atencion, es un siti complotista.” Aquò aurà pas nada resulta, es evident, levat benlèu suus sòcis deu govèrn, que pensan qu’es una accion plan miada e’n son contents.
 
Çò que lo govèrn deveré hèr, es de prénguer una o duas o tres teorias que córren sus la telaranha e desmontrar que son faussas gràcias a arguments convencents. Atau, lo qu’espia poderà comprénguer que cada teoria, quitament se sembla plasenta, es basada sus simplas suposicions o interpretacions liuras.
 
Sufís pas que d’explicar qu’Amedy Coulibaly a pas las mans ligadas quan sortís de l’iper kasher, qu’es tecnicament possible qu’Ahmet Merabet sia plan mòrt d’una bala dens lo cap sens nada sang barrejada, o sabi pas qué, ende respóner a unas de las idèias a la mòda que’s passejan peu web, e lo fenomène se desgonflarà tot sol.
 
A condicion d’estar convencent.
 
 

---