Deluns dia damb es companhs de Lhèida, parlam dera senténcia de retorn der patrimòni dera Franja e de desobeïr-la, amassada en espitau Arnau de Vilanova damb es professionaus sanitaris entà parlar de deficiéncies en servici e privatizacions, amassada damb eth SEM (Servici d’Emergéncies Medicaus) entà parlar deth conflicte des naui protocòus d’emergéncies, parlam damb era seccion memòria istorica deth grop municipau peth tèma des nòms fascistes enes carrèrs de Lheida e era vergonhosa posicion deth Baile Angel Ros e coma prèmi entrevista enes diaris Segre e La Mañana.
 
Dimars, reünions en Parlament: associacion d’arqueològs e grop parlamentari. Ath ser tà Badalona entà hèr ua assemblada dubèrta e explicar er acòrd. Erosaments en gésser me portèren a hèr un “bocata de calamares e croquetes”, bonissim!
 
Dimèrcles, classa ena UPF e tà meddia reünion damb eth President Puigdemont en Palai dera Generalitat e conferéncia de premsa. Parlam de fòrça causes, d’acòrds e de diferéncies, deth procès constituent e de tot çò que mos arribe. E La Vanguardia ditz qu’Anna e jo èm coma Telma e Louise. E nosati demanam qui ei Brad Pitt en tot açò.
 
Dijaus, entrevista damb El Punt Avui peth maitin, damb session de fòtos (çò que pejor pòrti!). Trabalh en Parlament entà premanir era interpellacion que presenti aué dimèrcles, e ath ser de cap entara presentacion deth libre Geografias de lo exótico, de Rosa Cerarols. Bieròtes e en tornar tà casa va eth mèn frair e me dèishe barrada en carrèr pr’amor qu’a metut eth borrulh ara pòrta. Deputada homeless totau!
 
Diuendres hèm ua formacion sus procès constituent toti es deputats dera CUP-CC, entà auer clares opcions e huelha de rota. En acabar amassada damb es grops ecologistes.
 
Dissabte hi hèsta, que creigui que m’ac guanhi, non?
 
Dimenge de cap tà Mollerussa, assemblada-aperitiu, un concèpte que me shautèc e en acabat damb era gent d’Agramunt, que hèm a compareisher ath Conselhèr pera negligéncia der aiguat que provoquèc era mòrt de 4 mair-sénhers dera residéncia. Haram preguntes.
 
Çò de mès trist dera setmana, Muriel Casals se n’anèc, e Pablo tanben. Qu’era tèrra vos sigue leugèra.
 
Aué dimèrcles parlarè per prumèr còp en Plen, atenti ath Canau Parlament tàs 15h30! Punets a toti!

---