Vaquí una frasa ausida fòrça sovent per aquesta passa. Lavetz, l’Estat francés es en guèrra?
 
Caleré meslèu díser “òc e non”. La formula mès adequata seré “Lo monde es en guèrra e aqueste còp sèm tocats nosautes tanben.”
 
Pr’amor que son tostemps los pòbles que son nafrats e tuats.
 
L’atemptat de Niça estoc vertadèrament òrre (84 tuats), e dempuèi la coalicion a bombardat Al Toukhar, dens la província d’Alèp, en tuar 56 civius deus quaus 10 dròlles, (160 segon la propaganda de DAESH).
 
Es pas acabat. L’Estat Islamic a perpetrat un aute atemptat en Afganistan a Kabol dens lo barri de Dehmazang, au bèth miei d’una manifestacion chiita, que dalhèc 61 personas e que’n nafrèc 207 autas.
 
Benlèu qu’entre lo moment quan escrivi aqueste tèxte e sa pareishuda, quicòm d’aute de grèu se serà debanat.
 
Tot escàs après lo 14 julhet ensagnosit de Niça, la pelejada politiciana se descabestrèc, que las eleccions se sarran. Aquò estoc pas au nivèu que las circonstàncias aurén exigit, e cadun portèc las responsabilitats … sus las espatlas de son adversari.
 
Es mauaisit d’i véser plan clar. Com après cada accion d’aqueste tipe, las informacions se crotzan, pas totjorn vertadièras, e cau aténguer un briu per ne saber mès.
 
Mes i a quicòm qu’aperèc mon atencion abans que lo debat portèsse dessús: un comerçant de Niça expliquèc que, las dimenjadas e los jorns sabatèrs, a pas lo dret de s’aprochar deu centre de la vila dambe sa camioneta, qu’es conhit de cameras e que risca un verbau. Aquò sembla meslèu concernir mès las petitas camionetas que non pas los gròsses camionasses de 19T miadas per un terrorista que, segon informacions arribadas mès tard, se passegèc uns jorns per carrèras abans de passar a l’accion.
 
L’entrevista de la responsabla de la susvelhança vidèo de la vila de Niça, qu’acusa adara lo ministèri de l’interior de pressions suu rapòrt, me deishèc tanben saunejaire: estoc avertida per policièrs de la preséncia d’un camion hòu, puèi l’an cercat e trobat suus telons. Lavetz de qué servissen la cameras, s’es pas ende pervénguer una accion e non pas la seguir au moment quan se debana?
 
Pr’amor qu’i a quicòm qu’es totun evident. Pendent lo famós Eurò de butabala, nos an hartats cada jorn dambe las fanzones e las palpations qu’an assegurat una competicion fòrça escaduda. Ende l’arribada deu Tour de France, haut, un còp de mès un reportatge sus la securitat assegurada per uns 2.000 foncionaris. E vaquí que, lo 14 de julhet, dens un eveniment pervist que’s debana cada annada, 30.000 personas s’amassan, çò que’ns hè una bèra pichona fanzone, mes pas nada palpation, ren de securizat. Es après que las autoritats dison las atacas per veïcul èran dejà aconselhadas suu siti de l’Estat Islamic. Doncas, se son encargats de la securitat antiterrorista, ac sabèvan. Un dispositiu leugèr hèit dambe hautas puntas de metau capvath las carrèra pòt estancar un quite camion. Benlèu mès eficaç que “los cònes de plastic iranges” (!) que desviavan la circulacion au cap de la Passejada deus Angleses.
 
Vaquí que nos arriba una auta informacion: lo miaire deu camion auré dit aus policièrs que “liurava gelats”. 1/ An pas verificat? 2/ Lo camion èra pas frigorific, au maugrat de çò que digoc lo procuror Molins (!) e de las fòtos deu camion que totis an vistas qu’ac muishava clarament.
 
La securitat de l’Eurò èra una grana causa nacionala endeus nòstes gavidaires que son pas que dens lo paréisher. Christian Estrosi se vantava d’aver la vila mès segura de França mercés a sons policièrs e sustot sas cameras de susvelhança. Digoc lo 19 de genièr de 2015 qu’èra “haut o baish convençut que París estosse equipat deu medish hialat de cameras que lo lor, los fraires Kouachi aurén pas passat tres cairehorcs sens d’estar neutralizats.”
 
Òsca Christian!
 
Sabi pas se sèm en guèrra, mes çò de segur es que sèm en guèrra civila entre politicians.