Vaquí una novèla fòrça discreta en aqueste mes d’agost, entre los Jòcs Olimpics, los anar e tornar deus vacancèrs e los conselh ende causir la bona crèma solara, tot çò dambe qué vòstes grans mèdias vos hartan …
 
Fòrça discreta, mes tan importanta, que va cambiar fòrça causas, en purmèr benlèu nòste espiar sus la Justícia Internacionala e son Tribunau. Es justament aqueste Tribunau Penau Internacionau qu’acaba d’innocentar de “crimis de guèrra” Slobodan Milošević, que patiscoc un procès long de cinc ans e que’s moriscoc en preson abans la fin, dens circonstàncias que calerà tanben espiar de près.
 
Lo sol medium drin “oficiau” que’n parlèc es … la Despacha deu Miejorn (!), au miei de Egalité et Réconciliation, siti de dreta extrèma de l’Alain Soral, d’Agora Vox (medium ciutadan) e uns sitis en anglés. Cau mercejar granament lo jornalista estatsunenc Andy Wilcoxson que publiquèc un article suu blòg Counter Punch, sens lo quau l’informacion seré passada a la bedoceta (tolosianisme ende “bordilhièr”).  
 
Perqué un tau silenci? Pr’amor qu’aquò torna botar en question la legitimitat deu tribunau que’u condemnèc dètz ans i a, dambe la carga de crimis de guèrra, crimis contra l’umanitat e genocidi dens un procés qualificat per CNN de “mès important dempuèi Nurembèrg”. Acho!
 
Tiò, acho, pr’amor qu’aqueste procès estoc jutjat de “parodia” per un expèrt que, citat peu Sunday Times, expliquèc que 80% deus atenduts de l’acte d’acús serén estats disqualificats per quina cort britanica que sia, estant pas que rumors.
 
Aquò nos torna mandar au procés de Nurembèrg justament, e de sons celèbres articles 19 e 21 que dison: “Lo Tribunau serà pas ligat per las règlas tecnicas relativas a l’administracion de pròvas” e “Lo tribunau exigirà pas que sia raportada la pròva de hèits de notorietat publica, mes les tendrà per aquesits. “ Cau pas desbrembar que, istoricament, lo TPI es lo hilh deu tribunau de Nurembèrg.
 
Sovent descrit com un dictator per la premsa internacionala (véser imatge), Milošević estoc democraticament elegit e deishèc lo poder democraticament en seguida d’una eleccion, dens un país on 20 partits liures animavan la vida politica. Estoc tanben descrit com un “nacionalista sèrbi”, lavetz qu’èra meslèu un socialista qu’ensajèc de manténguer una Iogoslavia multietnica en tot s’acarar justament aus nacionalistas.
 
Bon, acabam aquí dambe l’apologia deu Slobodan, vòli pas díser qu’èra un anjo, lo debat pòrta pas sus sa personalitat o son òbra, mes sus jutjament deu TPI. Vòli díser que son pertrèit que’ns muishavan a l’epòca èra fòrça desformat.
 
Sèm aquí dabans la capsa de Pandòra qu’es daubèrta. Calerà lèu tornar condar tot çò que’s debanèc au moment de la guèrra en Iogoslavia, mes dambe cartas rebatudas.
 
En seteme de 2001 dejà, la cort de justícia de l’ONU avèva establit que lo “genocidi deu Kosovò” èra estat una simpla invencion deus Occidentaus ende botar la pression suu govèrn sèrbi (!).
 
Lo dossièr “Iogoslavia” se torna daubrir, dambe lo ròtle jogat peu Bill Clinton, peu nacionalsite croata Franjo Tuđman, peu bosniac Alija Izetbegović, peus nòstes Bernard-Henri Lévy e Bernard Kouchner, lo que creèc l’aficha de manipulacion que hascoc créser a l’existéncia de camps d’exterminacion en Bosnia, mes auram lo parat de’n tornar parlar.
 
End’acabar uei dambe una remèrca subjectiva, tornarèi brembar que los responsables de la guèrra en Iraq (mès d’un million de victimas) devath lo pretèxte d’una mentida desvergonhada de preséncia d’armas de destrusida massiva, van eths fòrça plan, son plan rics e respectats, e vos mandan lor salut.