Anem i de qualques evidéncias… Nòstres aujòls los Galleses… la França etèrna… lo gal gallés lo sol capable de cantar los dos “pès” dins la m…, non, excusatz, sus un femorièr… “mèrda”, un mot que definís la lenga d’oïl de Cambrona a l’epòca modèrna… (las gents del Sud[1], grand o petit, emplegan “cong”, “putaing” o los dos a l’encòp)… Los primièrs cantaires franceses[2], Guilhèm de Peitiu, Marcabrun, Ventadorn, etc. èran pas d’anonims… La lenga francesa es la sola que ne coneissèm lo primièr escrich: lo Jurament d’Estrasborg, lo 14 de febrièr de 842[3]…
 
Idèas recebudas aital, n’avètz totes dins la saqueta amb naturalament lo “baston de manescal” que vos servirà se vos petaçatz plan.
 
Aquel país envejat per totes los èssers umans quitament los dels autres planetas – E.T. per exemple – es un país fondat pels Galleses e sus una idèa simpla: resisténcia e coratge cap a las espròvas, cap a l’enemic, als enemics. Desempuèi las originas, s’es pas jamai desmentida gràcias als modèls que lo país s’es balhat; de Vercongetorix a De Gaulle e de Dunkerque a Tamanrasset un còp èra[4].
 
Aquel preambul èra per prene la defensa de totes los que vòlon restaurar l’Istoria de França, lo Roman francés… E Nicolas n’es lo pòrtaparaula mai afogat. Empleguèt de paraulas fòrtas: “Lo jorn que òm ven Francés, nòstres aujòls son los Galleses”.
 
Degun, abans el, i aviá pensat. Cal que los ciutadans passats, presents e a venir ajan las idèas claras. Los cal pas enrambolhar amb los Huns (e perqué pas los autres), los Visigòts e autres Ostrogòts, los Arabis arrestats a Peitiu, etc.
 
L’evangèli republican deu èsser adoptat sens pausar de questions…
 
I a pas que los bobos a se regaudir d’èsser per part rus o polonés e per part cashmiri o pashton e a se reclamar d’una identitat multipla… los bobos o los “migrants” que vòlon pas comprene que la libertat se pot concebre pas qu’amb l’uniformitat.
 
Cal complimentar tanben l’esquèrra de govèrn que ven de sortir un decrèt fantastic sus l’isolacion; aqueste decrèt concernís “l’isolacion dels bastiments”.
 
França seriá pas França se s’engatjava pas a fons per far d’economias d’energia e aital sauvar lo planeta. Los que vòlon isolar lor ostal deuràn l’isolar per l’exterior se vòlon tocar las ajudas. L’Estat, se vòl èsser coerent, deurà far tot parièr. Serà polit de veire lo resultat!
 
Mas cal causir: lo recalfament climatic o l’isolacion,  l’estetica o las subvencions…
 
Unifòrmes e casèrnas nos simplicarián la vida. Totes amolonats, nos tendriam cauds e los unifòrmes nos permetrián  de veire de tira qui es pas Francés…