Opinion
Vita e quotidian d'un professor d'occitan
Arribo d’ora a bèl exprèssi per far de fotocòpias. Mas la màquina fonciona ren. De collègas pròvan de se conectar tanben per far de fotocòpias mas es impossible…
Un qu’es grana maissa, fa lo sieu bulo mas i càmbia ren. De bòn matin, incarna l’inutilitat de l’enervament e lo verbiatge. Ajusta mai de tension. E los professors presents se’n pilhan: “incapables, avètz rota la maquina...” amb ironia pensam ben...
Lo temps passa e la campana tinda. Es l’ora d’anar cercar los escolans. Fau lo cors e coma sèm lèstes rapidament per la seguia me cal las fotocòpias. Demando a doas escolanas (cal jamai far desplaçar un escolan solet) de davalar explicar precisament que la fotocopiaira es en pana e que van a l’administracion per ne’n aver 3. Veno d’aver d’escolans de mai ancuei e me cal ben lor donar de fuelhs coma los autres.
Las fau ben repetar çò que dèvon dire per explicar qu’esto matin -ben avans lo cors- istòria de ben dire qu’èra per preveire, volio far còpia d’un document mas la maquina non foncionava. E que demandan l’autorizacion de copiar a l’administracion. Lor explico que seràn benlèu vistas d’un uèlh inquisitor “de que fasètz aicí” mas son lèstas...
Davalan. Mas se fan mandar d’ont venian per un responsable. Lo responsable ditz “avètz ren d’a far aicí. Tornatz en cors. Vos cal dire a vòstre professor de far sas còpias solet”. Blocat. Tòrnan en me cuntar. Increïble, çò qu’avio previst se realiza…
Après, telefòno a de personas per saber se pòlon acceptar doas escolanas per far de còpias, me dison “las fasètz après lo cors...”. Es bèl mas n’ai d’a besonh per aquel cors!
Me dison, excepcionalament una o doas còpias...
Penso me’n sortir en far foncionar lo videoprojector, mas degun gardarà la traça dal trabalh. Servirà en ren…
Fin finala avèm amb çò que me rèsta, un fuèlh per dos escolans. Mas quina complicacion per pauc de causas.
Davalo al secretariat, la secretària ne’n passa una segonda en dire “Vos cal preveire en avança per far las còpias, fau passar lo messatge...”.
Es genial, que vos fan passar per lo marrit en dire, es de vòstra fauta…
Aürosament de còups ambals escolans avèm de moments de gràcia, que percutan, que se ve qu’an capit. Alora es la soleta recompensa. Que per lo demai, es sovent lo trin trin. Bònjorn, bònsera…
Devo ancara veire los principals adjonches per far lo ponch s’avèm de novèls inscriches après lo mieu segond passatge en classa. Veirem.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#7 Compreni pas Laurenç çò que provòca ta colèra o ton amarum dins çò qu'ai escrich mas m'avisi que i a quicòm que truca, èri sincèr, cresi que i a un problèma d'interpretacion, parlavi dels ensenhaires que pòdon aver de dificultats, per dire que d'èstre en dificultat deviá pas èstre vergonhós, que ne devon pas èsser vergonhoses, los ensenhaires, deguns es pas perfièch, es normal d'aver de dificultats, me fasiái lo lor avocat mas benlèu qu'as cregut que te fasiái a tu lo repròchi d'èstre en dificultat (?) Aquò, ne sabi pas res, parlavi pas que d'autras gents que conoissi. Desencusa-me se te sès sentit mes en causa. Soi confús.
#2 Car "Benlèu" (o qual que sieie la persona darrier aquel pseudonim)...
me chal t'escriure, òc, malgrat segurament ta segura securitat anonima.
Perqué? Perqué!
Òc, non... E bèn, Benlèu!
Esto matin, a 7h 45, en sala dals professors, ai pensat a tu. Coma a la veitura de'n fàcia que passa. Una pensaa religaa al nonres qué!
Perqué doncas? A la coa galharda d'aquels professors, "colllllègas" pegats a la maquina de fotocòpias (de professors de mats en nombre... un constat?, mas tanben una d'italian, una d'SVT, doas d'istòria, of!!!) e la tiera que s'alonga. E la campana que sòna per lo segond còup e la tiera que desemplisse ren. E a tres fotocòpias que te mandarai ren per mail via aquestes comentaris. Non, serà ren per esto matin.
Serà per un jorn..., quora Robèrt Lafònt serà elegit president!
Coralas saluacions de nòstre canton, segurament luenh de ta realitat.
#5 Benlèu que soi pas estat plan comprés.
Mon comentari s'adreiçava pas especificament a vos o a vòstre article mas a una comunautat de legeires. Doncas i a res a i prene d'un biais personnal :(
La tonalitat de mon comentari èra pas de balhar de leiçons, de jutjar, o de criticar. De far de rasonaments tanpauc. Sabi ben qu'avètz plan mai d'experiéncia que ieu e que soi plan mal plaçat per o far (e n'ai quitament pas l'enveja). I a pas d'ironia a trapar entre las linhas.
Avètz fach l'esfòrç de partejar vòstre viscut publicament d'un biais pertocant, mon comentari es solament nascut de l'interés que portèri al vòstre article e a la vòstra demarcha.
Coralament,
GT
#2 Ai benlèu apreciat a sa justa valor aquest comentari. En particular "cal saber e comprene que i a de professors que son en dificultat, e òc, an pas totes la meteissa capacitat d'adaptacion".
Autre provèrbi: "Lo jutge jutjarà. E lo riu, riulejarà".
#1
Mercés de vòstre messatge mas tan val de precisar qu'ai pas escrich aquesta opinion perqué ai de besonh d'aver de responsas o d'astúcias especificas o que me sentissi dins l'espèr d'aiçò. Coma un grand garçon, trobèri desempuèi lo temps de biaisses, un pauc en retipar de collègas, un pauc en anticipant, un pauc en mòde recèrca-error o en me metent dins la situacion la mai pièger. De parlar de dificultats met en posicion de deblesa, mas me sentissi pas feble, e sabi mostrar las dents e respondent coma cal a lo de qui cal, del collegian amb una ora de retenguda a l'Adjonch. E es verai qu’en vos legir, mai d’un còp me venguèt l’estomegada.
Ai soncament fach un testimòni que se resumís aital: de còps, pòt èsser complicat s'avètz besonh de 3 fotocòpias soncament (perqué en occitan, sustot al començament de l’an, avèm un virament important d’efectius)! Après, cadun compren çò que vòl.
"Efectivament los escolans, subretot del collègi, mancan pas de se trufar d'un professor que s'enbufa a causa d'una maquina que marcha pas."
Qual a parlat de s'embufar davans de collegians? Es en sala dels professors que se passa la scèna. Es la primiera règla, jamai s’embufar davans los collegians, o sabiatz pas?
"E an plan rason en fach :D - mas benlèu qu'aquò fa tanben partida de l'educacion de mostrar a d'enfants que cara a de problemas se pòdon trapar de solucions. Benlèu qu'aquò pòt permetre al professor de trapar justament lo respècte."
Òc, un professor que li manca la sala, pòt logar un ALGECO en cas de besonh! Un foncinari, e ben fonciona, non? :-D
Ont es question de non respècte del prof en aquelas linhas? En cas de problèma material, un conte necessita ren de tot! E per pegar un escolan, un estilo sufís tanben. Un Bic, negre, pas car. A Casino, a costat la caissa.
"1) [...] m'estampi tot a volontat a l'ostal (mas efectivament me carregi las fotocòpias - es una causida)"
Senon, ieu l'estampaira hp qu'ai pagada per me far de fotocòpias a l'ostal, me pren mai de temps en faguent 1 fotocòpia que de far 10 fotocòpias al trabalh! E es pas lo pes que me destorba.
Ren de veire, sètz sus quant d'establiments escolars?
"Una bona maquina deuriá pas vos costar mai de 100 euròs."
Es verai que los professors son pas rics...
"2) Aprèp, per balhar responsa als problemas pas prevists en cors, ai totjorn dins l'arca de l'autò un parelh de "baflas" (15 euròs) se per cas las de l'ordenador de la classa venián a tombar en pana.
Me soi crompat tanben un "retroprojecdor" de pòcha (70 euròs) que gardi tanben dins la veitura amb los diferents fials necessaris."
Vòl dire que, per far la scèna qu'avètz escricha: Començatz lo cors, los autparlaires/ lo videoprojector tomban en pana. Quitatz la classa e anatz tranquilament cercar lo material dins l'auto? E ont van los escolans, qual los garda??
"3) Ai, efectivament, totjorn l'ordenador portable amb ieu. Mas aquò es subretot per poder trabalhar tranquilòt ont vòli dins l'establiment pendent los traucs."
Perqué, an ges de sala de prof amb al mens 3 ordinators dins vòstre(s)s establiment(s)?
"4) Ai una valiseta de plastic (20-30 euròs) ont dedins mèti los documents "classics e essencials" : cançons, ajudas gramaticalas, exercicis, ficas d'autorizacion de sortida etc que daissi mai o mens sovent dins la veitura, e que me permet tanben de far fàcia a çò pas previst."
Òc n'avètz quant d'exemplars d'aquels papièrs de cada « cançons, ajudas gramaticalas, exercicis, ficas d'autorizacion de sortida etc »?
E se n'es de besonh en cors, coma ja vist mai aut, suspendètz vòstre cors per cercar de material dins la veitura, sus lo parcatge dels professors s'entend, pas davans la pòrta de la sala de classa pensi plan?
"Cresi qu'un professor d'occitan d'al jorn de uèi deu èsser un pauc "autonomista" :D"
Mercés per la leiçon d’autonomisme. Coma ditz lo provèrbi, sabi trobar la boca per manjar.
Occitanament, soi fatigat. E trantalhèri avans de pensar a publicar aquesta primiera part d’opinion. Me sembla que la bresca, d’unes se la serián inventada. E vesi que me soi pas enganat… ;-)
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari