Ai pas res contra sas idèas que las poiriái faire meunas per una granda part mas aimi pas l’òme, un nacionalista acarnassit que, per ieu, n’es damorat a la rega blava de las Vòsges e qualqu’un que, coma tantes autres dins nòstre exagòn, se vei coma l’òme providencial, un de mai!
 
Aquel òme tractèt la setmana passada un autre candidat a la presidéncia de grand borgés, unicament a la sòlda del Capital, etc. e l’acusèt de conéisser pas res del pòble. Es evident qu’el, elegit desempuèi l’an pèbre, mai que mai per çò qu’èra en posicion eligibla sus las listas presentadas, coneis naturalament de prèp los pensaments dels lendemans dificils. Vos agrada a vos?
 
Aquel òme diguèt, totjorn la setmana passada, qu’èra inutil que lo partit socialista presentèsse qualqu’un per çò qu’aqueste partit aviá fach la demonstracion de son despoder e sustot per çò que i aviá el, un òme qu’èra prèste, avant qu’òm li’n faguèsse la demanda, a assumir la carga de primièr ministre. Vos agrada a vos?
 
Aquel òme, deputat europèu del Sud-Oèst rebequèt a un jornalista, que li demandava explicacions a propaus de son absenteïsme a Brussèlas, qu’aviá de causas mai importantas a far coma de far campanha per l’eleccion presidenciala, etc. Que sàpia, la moneda que recep d’Euròpa es de moneda publica e la li balhan pas per quicòm mai. Pòdi pas pensar qu’es d’acòrd amb los elegits de la drecha extrèma qu’emplegan monde, pagats per Euròpa, per far lo trabalh del partit. Vos agrada a vos?
 
En anant sus sa pagina Wikipedia, me soi apercebut que sa biografia teniá gaireben del jornal intim. I aprenèm tot de sa familha, de sos parents d’origina espanhòla, de sa naissença en Marròc, de sas activitats socialas e politicas, de… Tot i passa mas me sentissi frustrat de saber pas s’attrapèt lo sarrampiu o la vairoleta e, se òc, quand! Res tanpauc sus sas aventuras amorosas çò qu’es “anormal” dins una biografia autan precisa…
 
Aquel òme, coma dison los joves – mas soi pas tròp al fial del lengatge “djeun” –, “se la peta” un pauc tròp. Mas li cal rendre justícia; a trobat monde per l’iniciar als like de Facebook, als bresilhadisses (twitter), a las vidèos de U-tube, etc.
 
A comprés que li caliá èsser agachat pels joves se voliá aver la bona fortuna d’èsser causit demest lo fum de candidats diches d’esquèrra.
 
N’i a que diràn que soi gelós fàcia a un òme autant intelligent, fàcia a un orator autan carismatic, fàcia a un revolucionari —in camera— amic e discípol dels defuntats Chàvez e Castro. Que non pas!
 
Mas aquel òme aurà pas mon bulletin de vòte unicament per la rason qu’es contra l’existéncia e la practica de nòstras lengas regionalas, per nosautres, l’occitan…