L’ahar de Penelope Fillon s’es descabestrada après la pareishuda d’un article dens lo famós Canard Enchaîné que pretend la hemna deu candidat de la dreta a recebut un salari deus beròis per un emplec fictiu coma agent parlamentari de son marit.
 
Dempuèi, autas informacions son arribadas sus l’empont e sens de dobte n’i aurà encara d’autas entre lo moment quan escrivi aquestas linhas e lor pareishuda. Es pr’aquò que perpausi d’analizar drin tot aqueste rambalh sus la sola basa deus accuses de l’article de nòste Guit Encadenat preferit.
 
Vesèm dens aqueste ahar màgerment tres elements que poderén estar arcastats a l’elegit:
 
1/ A emplegat sa hemna coma agent parlamentari.
 
Deu punt de vista de la lei, François Fillon a pas ren de crànher d’aquò, es perfèitament legau, totis los tenors de la dreta an aucupat los mèdias aquesta setmana end’ac tornar brembar. La lista deus agents parlamentaris venguts de la familha deu deputat es pas tan braca qu’aquò, tan de dreta que non pas d’esquèrra.
 
Totun, lo parlament europenc a interdit aquesta practica e lo parlament alemand tamben. Aquò pròva plan qu’aquestas instàncias an jutjat qu’èra pas morau e que podèva estar l’encausa d’abuses de totes. Lo debat pòt lavetz estar legitimament daubèrt per çò qu’es de l’amassada nacionala de l’estat francés.
 
Per contra, Sénher Fillon a causit de passar tamben davant una jurada populara qu’es aquesta deus electors, e soi pas segur que’u grasiscan la situacion. Son imatge de “Sénher Net” (coma l’apèra la premsa estrangèra) se’n tròba fòrtament escornat.
 
2/ Penelope Fillon èran pagada autan que tres agents parlamentaris.
 
Lo candidat a declarat dens Le Journal du Dimanche que las chifras èran faussas pr’amor que se mesclavan lo salari brut e lo salari net. Botèm, mès soi pas segur un còp de mès que lo Guit sortisca chifras que serén pas dètz còps verificadas. De tot biaish, aquò’s encara legau, mes pòt servir de repossader au miei d’un electorat popular que s’i escad mauaisidament d’aténguer las fin de mes.
 
Segon jo, es la carga màger que pesa sus las espatlas deu sartés. Bota a tèrra tota sa linha de campanha politica basada sus la probitat e la rigor e serà pas perdonat aisidament peus electors.
 
3/ Penelope Fillon auré pas vertadèrament trabalhat.
 
Aquò’s lo costat mès juridic de l’ahar. Se los dus punts citats son legaus, la justícia es ara a enquestar sus la veracitat de l’emplec. Oficialament, una mesa en examen seré la sola rason que miaré François Fillon a renonciar a la candidatura. Segon los elements en possession deu Guit Encadenat, sèm plan en preséncia d’un emplec fictiu, quitament se l’avocat deu suspieitat, Antonin Lévy (lo hilh de Bernard-Henry, ende balhar un imatge encara mès hòrta de microcòsme mediatico-politic), a portat aus jutges documents que tirarén ende provar que Penelope a plan trabalhat.
 
Se volètz mon avís, pensi que los jorns de François Fillon coma futur president de la républica son dejà comptats. Se la justícia l’obliga pas de renonciar per una mesa en examen, l’opinion publica l’a benlèu dejà condemnat. Sustot que, dempuèi, tot un hèish d’elements navèths son arribats, coma son gost deu luxe (viatges en jet privat, agrandiment de l’apartament de Matignon), l’emplec de sons hilhs “per lor competéncias” lavetz qu’avèvan pas encara lo diplòma d’avocat, los ganhs financièrs de son frair o tamben son implicacion dens l’escandale d’abús de ben sociau au senat (tres senators dejà meses en examen).
 
Quan pensatz que los sondatges balhavan a François Fillon uns 8% d’intencion de vòte en seteme, qu’a ganhat la primària largament, e qu’ara es en·hangat dens un ahar d’emplec fictiu, aquò pòt pas que nos brembar un cèrt Dominique Strauss-Kahn, prometut la magistratura màger avant d’acabar dens la rubrica deus “hèitas e hèits”.
 
Los dias qu’arriban seràn, cresi, passionants …